Այսօրվանից Իսպանիայում բացվել են բարերը և ռեստորանները, թեև ուտեստներն ու ըմպելիքները կմատուցվեն միայն բացօթյա հատվածներում:
Ինչպես euronews.com-ն է գրում, Մադրիդի և Բարսելոնայի բնակիչները նույնպես կկարողանան զգալ ազատության նոր շունչը, չնայած որ, ըստ պաշտոնական վիճակագրության, այս երկու քաղաքներում են գրանցվել COVID-19- ից երկրում գրանցված մահերի շուրջ կեսը:
Սակայն շատերի համար սահմանափակումների թուլացումը դժգոհության պատճառ է դարձել:
«Շատ արագ է ամեն ինչ կատարվում: Հայտնի չէ, թե ինչ կստացվի, եթե ինչ-որ բան այնպես չընթանա, տնտեսության համար հետևանքները կարող են լինել շատ լուրջ»,- ասում է Բարսելոնայի բնակիչներից մեկը:
«Գիտե՞ք, սրանք շատ մեծ քաղաքներ են՝ և Մադրիդը, և Բարսելոնան, միանգամից թողնել, որ բոլորը բարե՞ր այցելեն : Չգիտեմ, ինձ թվում է, որ տնտեսության ճգնաժամի հետևանքները թելադրեցին այս որոշումը»,-ասում է Բարսելոնայի մեկ այլ բնակիչ:
Հունաստանում այսօրվանից թույլատրվում է ճանապարհորդել երկրի ներսում: Ակտիվացնել տուրիզմը, որը քուն էր մտել կարանտինի պատճառով, Աթենքում խնդիր է, որը պետք է արդյունավետ և արագ լուծվի:
Գերմանիայում, որը բոլորից վաղ սկսել էր աստիճանաբար թուլացնել սահմանափակումները, վարակի օջախներ են շարունակվում գրանցվել վերջին մի քանի օրերի ընթացքում: Երկու խոշոր օջախ գրանցվել է մսամթերքի վերամշակման գործարաններում: Այժմ ցանկում ներառված է նաև Մկրտական եկեղեցին, որի հարյուրից ավելի ծխականներ վարակի կրողներ են:
Այսօր Ֆրանսիայում իշխանությունները մտադիր են ճանապարհային քարտեզ ներկայացնել մեկուսացման մեղմացման նոր փուլի համար: Այն պետք է պարունակի ցուցումներ բարերի և ռեստորանների, ինչպես նաև հյուրանոցների և վրանային ճամբարների հնարավոր բացման վերաբերյալ: Ֆրանսիացիները պետք է նաև հայտարարեն, թե ինչպես է թույլատրվում անցկացնել արձակուրդները:
