Վարչապետ Նիկոլ Փաշինյանը ֆեյսբուքի ուղիղ եթերում հայտնեց, որ կորոնավիրուսի կանխարգելման շրջանակում սահմանված կանոնները խստացվում են։
Ըստ Փաշինյանի՝ կորոնավիրուսի դեպքերի աճի հիմնական պատճառն արտադրական ձեռնարկություններն են, դեպքերի 75-80 տոկոսն արձանագրվում են արդյունաբերական ձեռնարկություններում և սպասարկման ոլորտում։
Վարչապետի խոսքով՝ վարակվելու դեպքերի աճի ամենամեծ ցուցանիշն արձանագրվել է բանկերի այցելուների շրջանում, որոնք 9-րդ միջոցառման շրջանակում հասանելիք աջակցությունը ստանալու համար գնացել են բանկեր և ոչ բոլոր դեպքերում են պահպանել կանոնները։
Ներկայացնելով դիմակը կրելու ուսումնասիրության արդյունքները՝ Փաշինյանն ասաց, որ պաշտպանիչ դիմակ մարդիկ պետք է կրեն ցանկացած տրանսպորտային միջոցում, մեքենայի մեջ, եթե մեկ հոգուց ավելի մարդ կա, և փակ վայրերում։
«Դիմակ կրելու կուլտուրան թույլ կտա զրոյացնել վարակման դեպքերը»,- ասաց Փաշինյանը։
Վարչապետն անդրադարձավ դիմակի գնին՝ նշելով, որ ՏՄՊՊՀ-ն ուսումնասիրություն է կատարում շուկայում։ Ըստ Փաշինյանի՝ կարելի է կրել նաև ինքնաշեն դիմակ։
Նա հորդորեց մարդկանց դիմակ չունենալու դեպքում 1․5 մ․ հեռավորություն պահել զրուցելիս։
Ըստ վարչապետի՝ որոշում է կայացվել, մեկ ամսով փակել բոլոր այն օբյեկտները, որոնք խախտումներ թույլ կտան։
