Բացառվում է երեխային ուղեկցող անձի մուտքը մանկապարտեզ. պարետատան կանոնները՝ նախադպրոցական հաստատությունների համար

Հրապարակվել են ՀՀ պարետի սահմանած կանոնները՝ մայիսի 18-ից վերաբացվող մանկապարտեզների աշխատանքների կազմակերպման համար (անվտանգության կանոններն ամբողջությամբ՝ այստեղ).

Բացառվում է երեխային ուղեկցող անձի մուտքը մանկապարտեզ:

Բացառվում են նախադպրոցական կրթական հաստատության շենքին հարակից տարածքներում մարդկանց կուտակումները: Հաստատություն հաճախող սաների ընդունումը և ճանապարհումն իրականացվում է հերթայնության կառավարմամբ:

Պետք է հնարավորինս ձեռնպահ մնալ կորոնավիրուսային հիվանդության բարձր ռիսկային խմբում գտնվող անձանց՝ աշխատանքի մեջ ներգրավելւց:

Երեխաների խնամքի և կրթության գործընթացը կազմակերպել բեռնաթափված խմբերով՝ դրանք դարձնելով 10-12 հոգանոց և ապահովելով խաղալու, պարապմունքների, սննդի և քնի ժամանակ երեխաների միջև 1.5-2 մետր սոցիալական հեռավորություն։

Հաճախման առաջնահերթություն տալ այն երեխաներին, որոնց տնային խնամքը գործնականում հնարավոր չէ ապահովել ծնողների կամ խնամակալների աշխատանքը հեռավար ձևով կազմակերպելու անհնարինությամբ:

Բացառվում է մարդկային կուտակում ենթադրող միջոցառումների, այդ թվում՝ հավաքների ու ժողովների անցկացումը:

Սահմանվում են նախակրթական հաստատության ամենօրյա ախտահանման կանոններ,

Ողջ անձնակազմն աշխատանքային և ընդմիջման ժամերին ապահովվում է անհատական պաշտպանության միջոցներով (ձեռնոցներ և դիմակներ)՝ դրանք 3-4 ժամը մեկ փոխելու հնարավորությամբ:

Օրական առնվազն երկու անգամ երեխաները ջերմաչափվում են: Ջերմող երեխաներին չի թույլատրվում մուտք գործել հաստատություն:

Հնարավորության դեպքում երեխաները բերում են սնունդը տնից՝ առանձնացված տարաների մեջ։

Նպատակահարմար է մեկանգամյա օգտագործման սպասքի կիրառումը։ Բազմակի օգտագործման սպասքի կիրառումը հնարավոր է բացառապես պարտադիր ախտահանման պայմանով:

Առողջ և անվտանգ պայմանների ապահովման
պարտականությունն ամբողջ ծավալով կրում է հաստատության (մանկապարտեզի) տնօրենը: