Հայաստանում առաջնակի օջախներից դուրս հայտնաբերված կորոնավիրուսի դեպքերով 27 պացիենտների հետ սերտ շփում ունեցածները ևս կարանտինում են: Aյս մասին հայտնում է ՀՀ առողջապահության նախարարության մամուլի քարտուղար Ալինա Նիկողոսյանը:
«Ինչպես նշել էի նախորդ գրառման մեջ, հանրագումարով հաստատված 160 դեպքից 133-ը փոխկապակցված են երկու առաջնակի դեպքերի օջախների հետ: 27 պացիենտների հետ սերտ շփում ունեցած կոնտակտավորները կարանտինում են, իսկ շփումների մյուս շրջանակը ինքնամեկուսացման մեջ է: Գործընթացը կրում է շարունակական բնույթ»,-նշել է Նիկողոսյանը:
Հայաստանում մարտի 21-ի դրությամբ կորոնավիրուսի հաստատված դեպքերի ընդհանուր թիվը 160 է:
Արտակարգ դրությունը գործում է Հայաստանի Հանրապետության ամբողջ տարածքում 2020 թվականի մարտի 16-ից, ժամը 18:30-ից սկսած մինչև 2020 թվականի ապրիլի 14-ը, ժամը 17:00-ն:
