Արմավիրի և Էջմիածնի քաղաքապետարաններում քաղաքացիների շփումները նվազագույնի են հասել: Աշխատակիցներն ապահովված են ախտահանիչ նյութերով ու դիմակներով, մի մասն աշխատում է տանից, իսկ փողոցների ու հանրային տրանսպորտի ախտահանման աշխատանքները շարունակվում են
Թեև օրն աշխատանքային է, բայց Արմավիր քաղաքի փողոցները նախկինի պես մարդաշատ չեն, մարդկանց հոսքը զգալի նվազել է: Բնակիչները զգոնություն են ցուցաբերում և տանից դուրս են գալիս անհրաժեշտության դեպքում: Ընդհանուր առմամբ քաղաքում հանգիստ է և խուճապ չկա: Վաճառքի կետերում աշխատողները հիմնականում ռետինե ձեռնոց ու դիմակ են կրում, սրահի օդը վնասազերծելու նպատակով խունկ ծխում, պահպանում հիգիենայի ամենապարզ կանոնները:
Դիմակ չունեցողների համար էլ կատակում, խորհուրդ տալիս դիմել հին ու փորձված մեթոդին` սպիտակեղենի ու բամբակի միջոցով:
Արտակարգ դրության պայմաններում Արմավիրի քաղաքապետարանն օպտիմալացված կազմով է աշխատում, որից աշխատանքը չի տուժում, հավաստիացրեց Արմավիրի քաղաքապետ Դավիթ Խուդաթյանը.
«Ունենք հիվանդ, տարիքով մեծ, մանկահասակ երեխա ունեցող աշխատակիցներ, որոնք տանից են աշխատում, այսինքն՝ քաղաքապետարանը բաց է, քաղաքացիներին ընդունում են և աշխատանքային պրոցեսը չի տուժել»:
Աշխատակիցները նույնպես պաշտպանիչ միջոցներ են կիրառում, ապահովված են ախտահանիչ նյութերով: Քաղաքացիների հետ շփումը հնարավոր չափով նվազեցրել են:
«Քաղաքացիները դիմում են ընդհանուր բաժին, եթե անհրաժեշտություն կա փաստաթղթեր փոխանցելու, աշխատակիցը փոխանցում է, ախտահանիչ նյութեր կան ամենուր: Սկսել ենք նաև քաղաքի կենտրոնական փողոցների ախտահանումը ախտահանիչ նյութերով, այս աշխատանքները պարբերաբար շարունակվելու են»
Ախտահանվում են նաև Արմավիրի ներքաղաքային երթուղային տրանսպորտային միջոցները, որոնց սեփականատերերի հետ պայմանավորվածությունը ձեռք է բերվել ու ամենօրյա ախտահանում իրականացվել դեռ մեկ շաբաթ առաջ:
Էջմիածնում շարունակվում են փողոցների ախտահանման աշխատանքները, ջրցան մեքենայից բացի դիմել են ավելի հնարամիտ ու արդյունավետ միջոցի՝ տրակտորին կցելով ջրցան ցողաշիթեր: Անվտանգության նկատառումներով Էջմիածնի քաղաքապետարանի քաղաքացիների սպասարկման մեկ պատուհան կոչվող սենյակում տեղադրվել են ապակյա պատնեշներ: Այս մասին ֆեյսբուքյան իր էջում տեղեկացրել է Էջմիածնի քաղաքապետ Դիանա Գասպարյանը և միաժամանակ զգուշացնում քաղաքացիներին՝ տանից դուրս գալ և քաղաքապետարան գնալ միայն խիստ անհրաժեշտության դեպքում:
