Հայաստանում այս պահին կա թոքերի արհեստական օդափոխության գործող 334 սարք, ևս 21 սարք ձեռք կբերվի Չինաստանից և Ռուսաստանից։ Այս մասին ֆեյսբուքի իր էջում հայտնել է ՀՀ Առողջապահության նախարար Արսեն Թորոսյանը՝ անդրադառնալով ԱԺ հատուկ նիստում պատգամավոր Լուսինե Բադալյանի հնչեցրած հարցին։
«Ի պատասխան ԱԺ-ում հնչած՝ թոքերի արհեստական օդափոխության սարքերի մեր երկրում առկայության և այն պնդման, որ «հանրությունը պետք է իմանա, որ դրանք չեն հերիքում», տեղեկացնում եմ, որ
- Այս պահին երկրում կա թոքերի արհեստական օդափոխության գործող 334 սարք։
- Այս պահին կա ռեզերվային/ազատ 15 սարք՝ հատուկ առանձնացված կորոնավիրուսային հիվանդությամբ պոտենցիալ պացիենտների համար։
- 3-4 օրից մեր պահեստում կլինի հավելյալ 11 սարք՝ ձեռք բերված ՌԴ-ից։
- 10-15 օրից մեր պահեստում կլինի հավելյալ 10 սարք՝ ձեռք բերված Չինաստանից։
Հ.Գ. «հանրությանը տարբեր հանգամանքների մասին տեղյակ պահելուց» առաջ, կարծում եմ արժի նախապես պարզել այդ հանգամանքները»,- գրել է Առողջապահության նախարարը։
