Նինոծմինդայի մունիցիպալիտետի Ժդանով (Ժդանովական) գյուղի բնակիչները բողոքում են, որ ձյան պատճառով արդեն մի քանի շաբաթ է դպրոց տանող գյուղի ներքին ճանապարհն անանցանելի է: Եթե ճանապարհը չմաքրեն, բնակիչները պատրաստվում են դիմել քաղաքապետարան, գրում է jnews-ը:
Ժդանովական գյուղի բնակիչներն դիմել են jnews-ի խմբագրություն, որ բարձրացնեն այս հարցը: Գյուղի բնակիչ Սամվել Մնոյանի խոսքով` գյուղի ներսում ճանապարհը ամբողջովին փակ է, մեքենաները չեն կարող անցնել, իսկ երեխաները դժվարությամբ են գնում դպրոց:
Ձյան տեղումներից հետո գյուղի ճանապարհը փակվել է, արդեն մի քանի շաբաթ է անցել, բայց ոչ ոք չի պատրաստվում այն մաքրել: Որոշ տեղերում ձյան բարձրությունը հասնում է 1,5 մետրի: Բնակիչների խոսքով՝ եթե այսօր ճանապարհը չմաքրվի, նրանք կդիմեն քաղաքապետարան:
Նինոծմինդայի 6 փողոցների, «Նորաշեն» միկրոշրջանի, ինչպես նաև 15 գյուղական ճանապարհների ձնեմաքրման տենդերը շահել է «Ուղեշինարար» ՍՊԸ-ն՝ 150,000 լարիի չափով: «Ուղեշինարար» ընկերության տնօրեն Արման Նորսոյանն ասել է, որ իրենք արդեն մաքրել են բոլոր այն ճանապարհները, որոնք նշված է տենդերում:
«Տենդերային փաստաթղթերում նախատեսված չէ Ժդանովովան գյուղի ներսում գտնվող ճանապարհները: Քանի որ նախատեսված չի եղել, դա արդեն մեր գործը չէ», – պարզաբանել է նա:
