Աիդա Ավետիսյան
«Ռադիոլուր»
Մայրաքաղաքի Օրբելի փողոցում դիտահորից հոսող կոյուղաջրերը ողողել են ամբողջ կենտրոնական փողոցը: Հինգ տարի շարունակ հարակից շենքերի բնակիչներն ահազանգել են պատկան մարմիններին, սակայն խնդիրը միշտ ժամանակավոր լուծում է ստացել: Նորոգումից մի քանի օր հետո փողոցում պատկերը նույնն է:
«Դիմել ենք պատկան մարմիններին, բազմիցս: Այնպես չի, որ խնդիրն անտեսվում է, սակայն գալիս են ու ասում, որ տեխնիկայի պակաս ունեն ու տեխնիկա իրենց չի տրամադրվում, ուստի խնդիրն անլուծելի է»:
Կոյուղաջրով լցված փողոցի ծառերն են անգամ չորացել, դժգոհեցին բնակիչները: Փողոցի լավագույն ծառն անցած ամռանն են արմատախիլ արել:
«Այնպես էր չորացել, որ անգամ մեծ ծառը կտրել հարկավոր չէր, այլ քաշելով հանեցին: Մենք տեսնում էինք, որ ջրերը ծառի կողքը հավաքված էին: Այն կողմի փարթամ ծառն էլ, որ կիսվել է, այդ կոյուղաջրերի պատճառով է այդ օրը հիմա»:
Բնակիչների ահազանգից հետո «Վեոլիա ջուր» ընկերության աշխատակիցների ուսումնասիրությունները ցույց են տվել, որ այդ հասցեում տեղային լուծում տալ հնարավոր չէ, քանի որ կոյուղագիծը տեղադրված է շատ խորը և համապատասխան տեխնիկա չունեն՝ խնդիրն արմատապես լուծելու համար. « Ռադիոլուրին» այս մասին ասաց ընկերության մամուլի պատասխանատու Մուրադ Սարգսյանը:
«Դրա համար մենք հանձնարարություն ենք տվել ընկերության հետ պայմանագրային հիմունքներով աշխատող շինարարական կազմակերպությանը, որն իր ծրագրերում ընդգրկել է այդտեղ համապատասխան աշխատանքներ կատարելու ծրագիր: Հուսով ենք, որ առաջիկա օրերին նրանք կկազմակերպեն այդ գործը և շատ երկար ժամանակ չի պահանջվի, և մարդկանց շատ հուզող խնդիրը կստանա վերջնական լուծում»:
«Ռադիոլուրը», ցանկացած պարագայում, հետևողական է լինելու խնդրի լուծմանը:
