Աիդա Ավետիսյան
«Ռադիոլուր»
2020 թվականի հունվարի 15-ից սպանդանոցային մորթը կլինի պարտադիր: ՍԱՏՄ-ից շեշտում են, որ սպանդանոցային ծագման մսեղիքով սպառողներին ապահովելու համար կգործադրեն առավելագույն ջանքեր: Սննդի անվտանգության տեսչական մարմնի կողմից հավաստագիր ստացած սպանդանոցներում, որոնք նախկինում իրականում գործունեություն չեն իրականացրել, այժմ վերաբացվում են և սկսում ակտիվ աշխատել: Սպանդանոցների ներկա խնդիրը աշխատողների սակավությունն է:
Արսեն Հակոբյանն Էջմիածնում արդեն երկու ամիս է աշխատեցնում է սեփական միջոցներով կառուցած սպանդանոցը: Գոհ է աշխատանքից, նույնիսկ չեն հասցնում եղած պատվերներն ամբողջությամբ կատարել: Վեց աշխատակից ունեցող սպանդանոցն ավելի ծանրաբեռնված կլինի, երբ հունվարին մորթը դառնա պարտադիր սպանդանոցային:
«Աշխատողների թիվը քիչ է: Աշխատող էլ չկա, բոլորը պարապ են, սակայն չեն գալիս աշխատելու: Մեր ազգը լոդրացել է: Համապատասխան մասնագետներ կան, սակայն աշխատելու չեն գալիս»,- դժգոհեց տնտեսվարողը»:
Սննդի անվտանգության տեսչական մարմնի ղեկավարի խորհրդական Արթուր Շատվորյանը «Ռադիոլուրի» հետ զրույցում հաստատեց, որ խնդիրն առկա է ամբողջ հանրապետությունում, սակայն վերահսկողություն իրականացնող կառույցը տնտեսվարողներին կարող է օգնել միայն խորհրդատվությամբ:
«Այո՛, այդ խնդիրը կա և կա ամբողջ հանրապետությունով: Մենք աշխատում ենք մեր ունեցած տեղեկատվության չափով մասնագետներին ուղղակի կապել տնտեսվարողների հետ» ,- ասում է Սննդի անվտանգության տեսչական մարմնի ղեկավար Արթուր Շատվորյանը:
8 ժամվա ընթացքում 40 տավար, 750-800 գառ մորթելու հնարավորություն ունեցող սպանդանոցն այժմ օրական իրականացնում է առավելագույնը 5 մորթ: Պատրաստվում են հունվարի 15-ից ուժի մեջ մտնող օրենքի պայմաններին՝ պարտադիր մորթին:
«Պատրաստվում ենք հունվարին, մասնագետ դառնալն էլ մեկ րոպեի խնդիր չէ: Բերել ենք մասնագետների, որոնք սովորեցնում են, բայց չգիտենք՝ 10-ից երկուսը կդառնա՞ն մասնագետ, թե՞ ոչ»,- նշեց Արսեն Հակոբյանը»:
Երկու ամսվա ընթացքում արդեն մոտ 60 մորթ իրականացրած սպանդանոցի սեփականատերը ևս մեկ խնդիր է բարձրաձայնում, որի լուծումը սպանդանոցը տալիս է:
«Եթե մսագործները գնում են գյուղից միս մթերում, շատ դեպքերում գյուղացիների գումարները չեն տալիս, իսկ երբ միսը մթերվում է մորթարանից, այս դեպքում գումարը չտալ հնարավոր չէ»,- ասաց Արսեն Հակոբյանը:
Նախնական տվյալներով՝ մինչ հունվարի 15-ը ՀՀ տարածքում կգործի 53 սպանդանոց, «Ռադիոլուրի» հետ զրույցում տվյալները փոխանցեց Սննդի անվտանգության տեսչական մարմնի ղեկավարի խորհրդական Արթուր Շատվորյանը: Եղածը բավական է պահանջարկը բավարարելու համար.
«Սպանդանոցները լինում են փոքր, միջին և մեծ տեսակի՝ ըստ շրջանառության: Մեր ունեցած հաշվարկներով՝ նախագծվող և նոր կառուցվող սպանդանոցների հաջող մեկնարկի դեպքում իրենց ունեցած հզորություններով հանրապետության ամբողջ պահանջարկը կփակեն», -ասում է ՍԱՏՄ ղեկավարի խորհրդականը:
ՀՀ տարածքում սպանդանոցային մորթի լիարժեք կազմակերպման, սպանդանոցների կառուցման կամ վերակառուցման, ինչպես նաև սպանդանոցային 5-րդ ձևի անասնաբուժական վկայականի էլեկտրոնային եղանակով տրամադրման նկատմամբ հսկողություն իրականացնելու նպատակով ստեղծվել է աշխատանքային խումբ։ Այն արագ արձագանքում է նոր կառուցող կամ նախագծման փուլում գտնվող ձեռնարկությունների դիմումներին: «Խմբում ընդգրկված են մասնագետներ, որոնք շրջելով մարզերով թե՛ խորհրդատվության, թե՛ տեղեկատվության առումով մեծ օգնություն են ցուցաբերում սպանդանոցներին»,-ասում է Արթուր Շատվորյանը:
«Մենք վերահսկողություն ենք կատարում նրանց աշխատանքի նկատմամբ, որպեսզի որևէ ձևով գործընթացից չշեղվենք: Մեր ծառայությունը բավականին գոհ է սպանդանոցների աշխատանքից» :
Ըստ ոլորտի պատասխանատուի՝ ակտիվացել է նաև այն սպանդանոցների աշխատանքը, որոնք թեև կառույցի կողմից հավաստագրված են եղել, սակայն չեն գործել: Այժմ դրանք էլ են ակտիվորեն վերաբացվում ու սկսում աշխատել:
