Հասմիկ Դիլանյան
«Ռադիոլուր»
Սողանք ու խողովակաշարի վթար՝ Սյունիքի մարզում, որի հետևանքով ունենք զոհ, վթարված խողովակաշարից էլ թափոնաջրերը լցվում են Ողջի գետը:
Պարզվել է, որ Զանգեզուրի պղնձամոլիբդենային կոմբինատին պատկանող Արծվանիկի պոչամբարի մետաղյա խողովակաշարի 2-րդ դյուկերում տեղի ունեցած վթարի հետևանքով են հոսքաջրերը լցվել Ողջի գետը: Բոլոր պոչամբարների անվտանգության առաջին պատասխանատուն շահագործող ընկերությունն է՝ ընդգծել է շրջակա միջավայրի նախարար Էրիկ Գրիգորյանը, նաև նկատել՝ խախտումների համար նախատեսված տուգանքները շատ ցածր են:
Սյունիքի մարզում թափոնաջրերը լցվում են Ողջի գետը. կառավարության նիստն այսօր սկսվեց այս հայտարարությամբ :
Կառավարության նիստի ավարտից հետո Բնապահպանության և ընդերքի տեսչական մարմինը հաղորդագրություն տարածեց, ըստ որի՝ վթարը տեղի է ունեցել «Զանգեզուրի պղնձամոլիբդենային կոմբինատ» ընկերությանը պատկանող Արծվանիկի պոչամբարի մետաղյա խողովակաշարի 2-րդ դյուկերում, որի հետևանքով էլ հոսքաջրերը լցվել են Ողջի գետը:
«Փորձանմուշները բնապահպանության և ընդերքի տեսչական մարմնի աշխատակիցները վերցրել են»,- հստակեցրեց շրջակա միջավայրի նախարար Էրիկ Գրիգորյանը: Գլխավոր դատախազ Արթուր Դավթյանը տեղեկացրեց, որ տեղում իրականացվում են քննչական գործողություններ:
«Մասնագետների մասնակցությամբ իրականացվում է դեպքի վայրի զննություն: Վնասված խողովակի հատված կա: Նախնական տվյալով հավանաբար այդտեղից է ջուրը հոսել»:
Արտակարգ իրավիճակների նախարար Ֆելիքս Ցոլակյանն էլ դեպքից այլ մանրամասներ հայտնեց:
«Ինձ առավոտյան զանգեցին այնտեղի փրկարարները, ասացին, որ իրենք են դա տեսել: Թաքուն են դա պահել, չեն ասել: Տերերը խողովակները արագ վերականգնել են»:
«Զանգեզուրի պղնձամոլիբդենային կոմբինատ» -ը 90-ականներին է իր խողովակաշարը տեղափոխվել Արծվանիկի պոչամբարի ուղղությամբ:
Ընկերությունը նաև հայտ է ներկայացրել մի քանի գետերից լրացուցիչ ջրառի թույլտվություն ստանալու համար: Շրջակա միջավայրի նախարար Էրիկ Գրիգորյանը վստահեցրեց՝ բազմաթիվ հայտեր չեն բավարարվում, եթե չեն համապատասխանում ՀՀ օրենսդրությանը: Նույն հայտով պատրաստվում է նախարարություն դիմել Թեղուտ ընկերությունը՝ Դեբեդ գետից լրացուցիչ ջրառի թույլտվություն ստանալու համար:
«Հազարավոր ջրօգտագործողներ կան՝ ՀԷԿ-եր, ձկնաբուծարաններ, բոլորը ջրօգտագործողներ են: Նրանց տրվում է իրավունքը՝ համապատասխան ընթացակարգերով»,- ասում է Էրիկ Գրիգորյանը:
Բոլոր պոչամբարների անվտանգության առաջին պատասխանատուն շահագործող ընկերությունն է՝ ընդգծում է ոլորտի պատասխանատուն, նաև նկատում՝ խախտումների համար նախատեսված տուգանքները շատ ցածր են:
«Քանի որ կարգավորումները մեծամասամբ ֆիկտիվ բնույթ են կրել, շատ դեպքերում ավելի շահավետ է եղել ոչ թե տնտեսական լուծումների գնալ, այլ վճարել վթարի 500 կամ 600 հազար դրամը և չանհանգստանալ»,- խոստովանում է Գրիգորյանը:
Ընդհանուր առմամբ Հայաստանում 44 թափոնակույտ ու 5 լքված հանքավայր կա՝ տեղեկացրեց շրջակա միջավայրի նախարարը: Ընդգծեց՝ առանձնացրել են առաջնային 10 վայրերը, որոնք, ըստ անհրաժեշտության, կռեկուլտիվացնեն:
«6 տեղ ունենք, որոնք կատաստրոֆիկ վիճակում են: Օրինակ, լքված պոչամբար կա, որի հարևանությամբ մարդիկ տնտեսական գործունեություն են ծավալել, օրինակ՝ ավտոլվացման կետ են սարքել»,- ասում է նախարար Գրիգորյանը:
Նախարարությունից «Ռադիոլուրին» հայտնեցին, որ խոսքը Կապան քաղաքի լքված արտադրական լցակույտի վրա ավտոտեխսպասարկման կետին է վերաբերում:
Ըստ նախարարի՝ մինչև այժմ ռեկուլտիվացիան հողով ծածկել էր նշանակում, այժմ նոր կարգ է մշակվել: Կառավարությունը տնտեսվարողների առջև այսուհետ հստակ պահանջ կդնի՝ պոչամբարն այնպես փակել, որ հետագայում հողերը հնարավոր լինի օգտագործել:
