Հասմիկ Դիլանյան
«Ռադիոլուր»
Երեւանում շարունակում է աշխարհի ամենահեղինակավոր տեխնոլոգիական միջոցառումը: ՏՏ համաշխարհային համաժողովի երկրորդ օրվա պանելային քննարկումների առանցքում եղել են համաշխարհային ճանաչում ունեցող ամերիկահայ հեռուստաաստղ Քիմ Քարդաշյանի ու Reddit-ի համահիմնադիր Ալեքսիս Օհանյանի պանելային ելույթները:
Ամերիկյան մեգաաստղը խոստովանել է, որ ոգևորված է Հայաստան այցելությամբ ու նման համաժողովին իր մասնակցությամբ: Ալեքսիս Օհանյանն էլ խոստացել է զարգացնել իր հայերենը:
Ամերիկահայ հեռուստաաստղ Քիմ Քարդաշյանը Երևանում լրագրողներին հայտնեց, որ երբեք չի դադարեցնի ԱՄՆ-ի կողմից 1915 թվականի Հայոց ցեղասպանությունը ճանաչելուն ուղղված իր պայքարը։
«Երբեք չեմ հանձնվի։ Հայոց ցեղասպանության ճանաչման հարցը բարձրացրել եմ Սպիտակ տանը` նախագահի խորհրդականի մոտ։ Մոտ ապագայում Ցեղասպանության ճանաչման հարցը մտադիր եմ քննարկել նաև նախագահի հետ»,-ասել է հեռուստաաստղը։
Երկրորդ անգամ Հայաստան եկած Քիմ Քարդաշյանն այսօր խոստովանեց. «Ես շատ հուզված եմ»:
Սա մեգաաստղի միակ խոստովանությունը չէր: Քարդաշյանը նաև խոստովանեց, որ ոգեշնչված է Հայաստանում տեսածով, խոստացավ, որ վերադառնալու է նոր գաղափարներով: Ասաց, որ շատ գաղափարներ ծնվում են հենց ճամփորդություններից:
Ինչպես ողջ կյանքի ընթացքում, այսօր նույնպես Քարդաշյանը խոսեց իր անձնական կյանքի մասին: Սա արդեն «Գաղափարների շուկա» լիագումար նիստի ժամանակ, որտեղ իր պանելային ելույթում պատմեց, թե երբ ու ինչպես է սկսել իր կարիերան: Ասաց, որ զբաղվել է ամեն ինչով՝ կոշիկ, հագուստ ու խմորեղեն է վաճառել, ուզում է, որ հատկապես կանայք հստակ ձևակերպեն իրենց նպատակներն ու հետևողական գնան դեպի դրանց իրականացում: Հայաստանում է արդեն երկրորդ անգամ:
«Այնքան ոգևորիչ է մեր երկրի համար նման հսկայական տեխնոլոգիական համաժողով անցկացնելը: Ես այնքան հպարտ եմ: շնորհակալ եմ, որ ինձ հրավիրել եք, հպարտ եմ, որ այսպիսի մեծ տեխնոլոգիական իրադարձություն է տեղի ունենում Հայաստանում, հպարտ եմ, որ ներկա եմ»:
Ժամանակ առ ժամանակ Քարդաշյանի խոսքը ծափերով էր ընդհատվում: Նաև՝ խոստովանությամբ.
«Ես սիրում եմ քեզ, Քիմ»:
Քարդաշյանը Հայաստանից գնում է նոր ու այստեղ ծնված գաղափարով: Մտածում է հայկական ծաղիկների բույրով օծանելիք ստեղծել:
Գործարար, «Reddit» կայքի և «Initialized Capital» վենչուրային ընկերության համահիմնադիր Ալեքսիս Օհանյանը նույնպես ուրախ է, որ Հայաստանում է: Խոստանում է աշխատել իր հայերենը զարգացնելու ուղղությամբ:
«Իմ գիրքը թարգմանվել է հայերեն, և ես կարիք ունեմ զարգացնելու իմ հայերենը: Ես երկու բառ գիտեմ հայերեն՝ շնորհակալ եմ, ցտեսություն»:
«Հայաստանը փոքր երկիր է, որը շատ հրաշալի մտքեր ունի». Օհանյանը սա լավ հնարավորություն է համարում տնտեսությունը զարգացնելու համար: Նաև նկատում է՝ հայերը սիրում են շախմատը, յուրաքանչյուր տարիքի աշակերտ սովորում է այն: Օհանյանը կարծում է, որ սա էլ հիանալի հիմք է ծրագրավորման մեջ հմտանալու համար:
