Հասմիկ Դիլանյան
«Ռադիոլուր»
Աննախադեպ ու յուրահատուկ՝ տնտեսագետ Վահագն
Խաչատրյանը «Ռադիոլուրի» հետ զրույցում 2020 թվականի գլխավոր ֆինանսական փաստաթուղթն
այսպես է բնորոշել:
Աննախադեպը՝
ցուցանիշերի աճն է, յուրահատուկը՝ քաղաքականությունը, որը որդեգրել է կառավարությունը՝ դեֆիցիտը փակելու համար: Ընդհանուր
տրամաբանությամբ՝ 2020-ի բյուջեի նախագիծը
ներառական տնտեսական աճ ապահովող է, կարծում
է Վահագն
Խաչատրյանը:
Աննախադեպ բյուջե՝ ավելի քան 3.5 մլրդ դոլար: Կառավարությունը հաստատեց հաջորդ տարվա գլխավոր ֆինանսական փաստաթուղթը: Նախագծի համաձայն, 2020-ին հանրապետության եկամուտները 1 տրլն 600 մլն դրամից ավելի են (կկազմեն 1 տրիլիոն 697մլրդ դրամ), ծախսերը՝ 1 տրլն 800 մլրդից ավելի (1 տրիլիոն 880 մլրդ դրամ, դեֆիցիտը (պակասուրդը)՝ 182մլրդ 567մլն 851 հազար դրամ է, այն 2019-ից ավելի է ՝ շուրջ 30 մլրդ-ով):
2020 թ.-ի համար ՀՀ Կենտրոնական բանկը կանխատեսել է 4 +/-1.5 տոկոս գնաճ: Տնտեսագետ Վահագն Խաչատրյանը «Ռադիոլուրի» հետ զրույցում ընդգծում է. «Աննախադեպ է այն առումով, որ զուտ տոկոսային առումով, որ նայում ենք, եկամուտները մոտ 15 տոկոս է աճը, ծախսերը՝ մոտ 17 տոկոս ավելանալու են: Տպավորիչ է»:
2020 թ. բյուջեի նախագծով նախատեսվում է նաեւ ավելացնել առողջապահական, կրթական և սոցիալական պաշտպանության ոլորտներին հատկացվող միջոցները: Առողջապահության ոլորտին հատկացվող միջոցները շուրջ 21%-ով ավելին են լինելու 2019-ից:
Կրթության ոլորտին հատկացվելիք միջոցները՝ 2020թ-ին նախագծով մոտ 15%-ով: Իսկ սոցիալական պաշտպանությանն ուղղվելիք միջոցները կազմելու են մոտ կես տրլն դրամ (489.4 մլրդ դրամ), ինչը ընթացիկ տարվա համեմատ ավելի է 10%-ով:
Ավելի քան 40%-ով նախատեսվում է ավելացնել բնակարանային շինարարությանն ուղղվելիք միջոցները: Բյուջեի նախագծով նախատեսվում է ավելի քան 2 անգամ կավելանան ճանապարհաշինարարությանն ուղղվող միջոցները: (Եթե 2019 թ. բյուջեով այս ուղղությամբ սահմանված էր 57.5 մլրդ դրամ, ապա 2020 թ. բյուջեով նախատեսվում է հատկացնել 124.4 մլրդ դրամ):
Տնտեսագետ Խաչատրյանը կարևորում է այն, որ 2020-ին վերջին տարիներին առաջին անգամ բյուջեի դեֆիցիտը ներքին աղբյուրների հաշվին է փակվելու: Սա պակաս ռիսկային է՝ ասում է «Ռադիոլուրի» զրուցակիցը. «Այս առումով բյուջեն յուրահատուկ է, կարող եմ ասել, որ կառավարությունը հստակ քաղաքականություն է որդեգրել՝ դեֆիցիտը փակել ներքին ռեսուրսների հաշվին»:
Արդյո՞ ք 2020-ի բյուջեի նախագիծը երկարատև ու ներառական տնտեսական աճի հիմքեր է ստեղծում՝ հարցնում եմ.
«Տրամաբանությունն այդպիսին է։ Ասեմ, որ 2019-ի բյուջեի տրամաբանությունն էլ էր այդպիսին։ Ես բացասական եմ գնահատում, որ ծախսերը թերակատարվել են, քանի որ այդ դեպքում ներառական աճի ազդեցությունն է նվազել: Սա այս կառավարության լրջագույն բացթողումներից մեկն է»:
Խաչատրյանը հույս ունի, որ 2020-ին ծախսերի թերակատարումներ չեն լինի, և կապահովվի բյուջեի ներառականությունը:
