Արցախի ՄԻՊ Արտակ Բեգլարյանը ելույթ է ունեցել ԵԽԽՎ-ում կազմակերպված «Մարդու իրավունքները համընդհանուր են» թեմայով միջոցառմանը:
«ՀՀ ԱԺ նախաձեռնությամբ և աջակցությամբ Արցախի Մարդու իրավունքների պաշտպան Արտակ Բեգլարյանը հնարավորություն ունեցավ մասակցել ԵԽԽՎ֊ում “գորշ գոտիների” վերաբերյալ քննարկմանը»,- գրել է իր ֆեյսբուքյան էջում ԱԺ նախագահ Արարատ Միրզոյանը ։
Արցախի ՄԻՊ-ը առաջին անգամ է ելույթ ունեցել ԵԽԽՎ-ում, իսկ Մարդու իրավունքների համընդհանրության հարցը նստաշրջանի օրակարգ ընդգրկվել է Հայաստանի ջանքերով:
Արցախի Հանրապետության Մարդու իրավունքների պաշտպան Արտակ Բեգլարյանը, Ստրասբուրգ իր այցի շրջանակներում, սեպտեմբերի 30-ին այցելել է նաև Ստրասբուրգի համալսարան՝ միջազգային հարաբերությունների մագիստրատուրայի մի խումբ ուսանողների համար դասախոսություն կարդալով ադրբեջանա-արցախյան հակամարտության, Արցախի պետականաշինության ընթացքի և մարդու իրավունքների պաշտպանության մեխանիզմների ու իրավիճակի մասին:
ԱՀ Մարդու իրավունքների պաշտպանի աշխատակազմի հաղորդմամբ՝ Պաշտպանը հակիրճ ներկայացրել է հակամարտության պատմությունը՝ շեշտադրելով, որ այն ծագել է հայության արցախյան հատվածի հիմնարար իրավունքների տևական ու կոպիտ ոտնահարման հետևանքով, որոնց վերջնական նպատակը հայրենազրկումն էր:
«Ահա այդ պատճառով ավելի քան 30 տարի առաջ Արցախի բնակչությունը ոտքի կանգնեց ընդդեմ ադրբեջանական բռնակցման և հանուն իր իրավունքների ու ազատությունների պաշտպանության: Դա առաջադեմ շարժում էր՝ հենվելով միջազգային իրավունքի հիմնարար նորմերի վրա, սակայն ստիպված էինք ծանր պատերազմում պաշտպանել սեփական հայրենիքում արժանապատվորեն ապրելու իրավունքը: Այժմ Արցախն ընթանում է պետականաշինության և զարգացման ճանապարհով՝ զուգահեռաբար դիմագրավելով ադրբեջանական սպառնալիքները»:
Ա.Բեգլարյանն ներկայացրել է նաև մարդու իրավունքների պաշտպանության ընթացիկ վիճակը, մեխանիզմներն ու մարտահրավերները: Նա շեշտադրել է, որ Արցախը պատրաստակամ է հնարավորինս կիրառել մարդու իրավունքների պաշտպանության միջազգային չափորոշիչները՝ իրեն համարելով միջազգային հանրության անբաժանելի մասը:
Պաշտպանը հրավիրել է համալսարանականներին այցելել Արցախ և հետազոտություններ իրականացնել տարածաշրջանի վերաբերյալ: Նա վերջում պատասխանել է ուսանողների հարցերին:
