Աիդա Ավետիսյան
«Ռադիոլուր»
Լոռու մարզի Թումանյան քաղաքի հիմնանորոգված ճանապարհահատվածում հետիոտնային անցում չկա, և բնակիչները բազմիցս ահազանգել են պատկան մարմիններին: Սա քաղաքից մեկ այլ կետ հասնելու իրենց միակ ճանապարհն է, որը ճանապարհային համապատասխան նշաններով չկահավորված լինելու պատճառով վտանգավոր է հատկապես երեխաների համար:
Լոռու մարզի Թումանյան քաղաքի գլխավոր մայրուղին՝ N- 6 կոչվող հատվածը, որը հիմնանորոգվել է Տրանսպորտային ծրագրերի իրականացման գրասենյակի կողմից, չունի հետիոտնային անցում և կահավորված չէ ճանապարհային համապատասխան նշաններով: Դժգոհությունները Թումանյանի քաղաքացիներից են: Ճանապարհի այդ հատվածը վտանգավոր է թե՛ վարորդների, թե՛ հատկապես երեխաների համար:
«Մեր մայրուղին է: Մեր երեխաները փողոցը հատում են գլխավոր ճանապարհով: Դպրոց, պարապմունքի, խանութ են գնում: Մեր ճանապարհն է, մեր անցնելու ճանապարհն է: Գոնե մի անկյուն լինի, մեր երեխեքը անցնեն »:
Դիմել են պատկան մարմիններին, սակայն արձագանք չեն ստացել, դժգոհեց բնակչուհի Նունե Գրիգորյանը: Խնդրին տեղյակ էր նաև Թումանյանի համայնքապետ Լևոն Զավարյանը: «Ռադիոլուրի» ասաց, որ իր նամակներին էլ չեն արձագանքել: Միայն խոստացել են քաղաքի սկզբնամասում տեղադրել բնակավայրի նշան, սակայն դա էլ չեն արել:
-Բայց այնտեղ բացի այդ նշանը, լուրջ քայլեր է պետք ձեռնարկել: Այդտեղով երեխաներ են անցնում ու շատ վտանգավոր է: Կամ արագաչափ պետք է քաղաքի մուտքի մոտ դրվի կամ արգելակող նշաններ:
-Իսկ վերգետնյա անցում կառուցելու հնարավորություններ չկա՞ն,- հարցնում եմ:
-Այդ հատվածում նման հնարավորություններ չկան:
Բարեբախտաբար, դեպքեր չեն գրանցվել, սակայն դրա վտանգն ամեն րոպե կա, ասում է քաղաքապետը: Լոռու մարզպետարանից տրանսպորտի և ճանապարհաշինության բաժնի պետ Վահրամ Ղարսայանն ասաց, որ միջպետական ճանապարհը Ասիական զարգացման բանկի հետ համատեղ իրականացնում է կապիտալ շինարարարություն և նշանները տեղադրված են: Տեղում Թումանյանի համայնքապետից ճշտեց խնդիրը և մեզ փոխանցեց, որ միջպետական ճանապարհ է և այդտեղ բնակավայր չի մտնում, դա բնակավայրին հարակցող ճանապարհ է, իսկ այդտեղ հետիոտնային նշանները այդքան էլ հնարավոր չեն:
«Այդտեղ հետիոտնային անցում չունենք: Այդտեղ թույլատրվում է 90կմ/ժ արագություն»:
Վանաձոր-Ալավերդի- Վրաստանի սահմանի միջպետական ճանապարհի Թումանյան քաղաքի վերոնշյալ հատվածում շինարարական աշխատանքներն ավարտվել են 2018 թվականին և հարցն իրենց կազմակերպության շրջանակներում չէ, «Ռադիոլուրին» տեղեկացրեց Տրանսպորտային ծրագրերի իրականացման կազմակերպության հանրային կապերի և տեղեկատվության մասնագետ Լիլիթ Գրիգորյանը:
Իսկ հիմնանորոգված ճանապարհահատվածում ճանապարհային նշաններն ու անվտանգության տարրերը տեղադրվել են ճանապարհային ոստիկանության հետ համաձայնեցված նախագծի շրջանակներում:
«Բնակչության տեղաշարժի անվտանգության նպատակով համայնքի ղեկավարի խնդրանքով ճանապարհի տվյալ հատվածում երկու կողմից կառուցվել են լրացուցիչ մայթեր: Եթե բնակչությունը ցանկանում է, որպեսզի լրացուցիչ նշաններ տեղադրվեն, ապա այդ հարցով պետք է դիմեն ճանապարհը շահագործող կազմակերպությանը և ճանապարհային ոստիկանությանը»,- ասաց Լիլիթ Գրիգորյանը:
«Ռադիոլուրը» դիմել է նաև Ոստիկանություն և սպասում է պատասխանի:
