Վանաձորն այսօր, այսպես ասենք, «պաշտոնական» տեսք է ստանալու: Այստեղ նախատեսված է վարչապետի հանդիպումը լրագրողների հետ: Սա Նիկոլ Փաշինյանի լրագրողների հետ այս տարվա երրորդ հանդիպումն է, առաջինը ՝ Երևանից դուրս:
Նիկոլ Փաշինյանի՝ լրագրողների հետ հանդիպումները ժամանակային սահմանափակումներ, որպես կանոն, չեն ունենում: Հարցերի շրջանակն էլ բավականին լայն է լինում: Պաշտոնավարման մեկ տարին ամփոփող ասուլիսն օրինակ տևեց հինգ ժամից ավելի:
Որքան կտևի այս հանդիպումը, պարզ չէ: Լրագրողների հետ այս հանդիպումն ի սկզբանե նախատեսված էր Գյումրիում, սակայն, օրերս վարչապետ Փաշինյանը ֆեյսբուքյան գրառմամբ բացատրեց, թե ինչու են փոխվել պլանները:
«Սիրելի հայրենակիցներ, նախկինում խոստացել էի, որ իմ հաջորդ ասուլիսը տեղի է ունենալու Գյումրիում: Բայց քանի որ այդ հայտարարությունից հետո մի քանի անգամ տարբեր այցեր եւ միջոցառումներ եմ իրականացրել Գյումրիում, եւ այս տարի եւս երկու խոշոր միջոցառում է նախատեսվում այնտեղ, որոշում կայացրի առաջիկա ասուլիսը տեղափոխել Վանաձոր»:
Տարեսկզբին Վանաձորում անցկացվել էր «Իմ քայլը հանուն Լոռիի» տնտեսական համաժողովը: Հենց այստեղ էլ վարչապետը հայտարարեց
«Եվ ուրեմն հերիք է նստենք. վեր կենանք ու քայլենք :
Փաշինյանի քայլերն այսօր ուղղվելու են դեպի Վանաձոր։ Այստեղ նրան սպասելու են ոչ միայն մարզային ԶԼՄ ներկայացուցիչները, այլ նաև Երևանից գնացած լրագրողները: Ասուլիսը տեղի է ունենալու Վանաձորի տեխնոլոգիական կենտրոնում:
ՄԻԳ հեռուստառադիոընկերության մեր գործընկեր Նարինե Մաթևոսյանը «Ռադիոլուրին» փոխանցեց՝ նախկինում չի հիշում, որ երկրի առաջին դեմքը ԶԼՄ-ների հետ հանդիպի ոչ թե Երևանում, այլ՝ մարզում.
«Նման հանդիպումներն ու ասուլիսները՝ վարչապետի, երկրի առաջին դեմքի կամ ղեկավարի, հիմնականում մայրաքաղաքում են կազմակերպել: Սա եզակի դեպք է, որ նաև մարզային լրագրողները հնարավորություն կունենան»:
Երկրի առաջին դեմքին տրվող հարցերն իրենց բովանդակությամբ տարբեր են: Եթե մայրաքաղաքում ավելի շատ հետաքրքում են քաղաքական ու տնտեսական հարցերը, Վանաձորում, զրուցակցիս կարծիքով, առանցքային կլինեն սոցիալական խնդիրները:
Զբոսաշրջություն, թեթև արդյունաբերություն, գյուղատնտեսություն. Լոռիում հիմնականում այս ուղղություններն են զարգանում: Գյուղատնտեսությունը ներուժ ունեցող ոլորտ է, սակայն Լոռիի 250 հազար հա հողերից 160 հազարը չի մշակվում:
Վերջին տարիներին մարզի այցեքարտը դարձել է ՏՏ ոլորտը, երբ այստեղ կառուցվեց Վանաձորի տեխնոլոգիական կենտրոնը: Արդեն 5500 երիտասարդ այստեղ ծրագրավորում է սովորել: Ու թերևս պատահական չէ, որ կառավարության ղեկավարը լրագրողների հետ որոշել է հանդիպել հենց Վանաձորի տեխնոլոգիական կենտրոնում:
