Արմինե Գևորգյան
«Ռադիոլուր»
Երևանի ավագանու այսօրվա նիստում գլխավոր թեման դարձյալ եղել է աղբահանությունը: «Սանիթեք» -քաղաքապետարան շարունակվող առճակատումն այսօր լրացվել է նոր ինտրիգով: Ավագանու ընդդիմադիր անդամներին զայրացրել է մանկապարտեզների վերանորոգման միջոցների հաշվին աղբահանությանը լրացուցիչ միջոցներ տրամադրելու որոշումը:
91 մլն դրամով կրճատվում է մանկապարտեզների վերանորոգման համար նախատեսվող գումարը, փոխարենն այդ գումարն ուղղվում է «Աղբահանություն և սանիտարական մաքրում» ծրագրին:
Ծրագրի ընդհանուր գումարը 1 մլրդ 726 մլն դրամ է: Ի՞նչու բյուջեով նախատեսված ծրագրերից մեկն իրականացվում մյուսի հաշվին: Ավագանու ԲՀԿ անդամ Միքայել Մանրիկյանն ասում է քաղաքը մաքրել պետք է, բայց դա անել նախադպրոցական հաստատությունների նորոգման հաշվին նպատակահարմար չէ: Ընդդիմադիր խմբակցության ղեկավարը առաջարկում է այդ գումարները ձեռք բերել այլ աղբյուրներից . «Օրինակ, աղբահանությանն ուղղվող միջոցներն ավելացնել ոչ թե երեխաների, այլ պարգևավճարների և գործուղումների ծախսերի հաշվին»:
Նիստը վարող քաղաքապետի առաջին տեղակալ Հրաչյա Սարգսյանը նկատեց. ոչ մի մանկապարտեզ դուրս չի մնալու վերանորոգման ծրագրից: Պարզապես այդ գումարը չի բավարարի 21 մանկապարտեզ վերանորոգելու համար: Վերանորոգման աշխատանքներն էլ սկսելու համար նախ պետք է մրցույթ հայտարարել, նախահաշիվ կազմել, շինարար գտնել : Այս ամենը մինչև իրականացվի, տարին կավարտվի: Հետևաբար որոշել են փողն ավելի արդյունավետ օգտագործել: Այդ ամբողջ տեխնիկան Երևանում կլինի արդեն աշնանը և կլուծվի աղբահանության խնդիրը:
«Նույն խոստումը տալիս էիք ամռանը, հավաստիացնում, որ մինչև օգոստոս քաղաքը ամբողջությամբ կմաքրվի: Ի՞նչն է պատճառը, որ չեք խզում «Սանիթեքի» հետ կնքած պայմանագիրը».- փոխաղաքապետին հարցրեց «Լույս» խմբակցությունից Թեհմինա Վարդանյանը: Ավագանու անդամը հիշեցրեց Հայկ Սարգսյանի երեք ամիս առաջ արած այն արտահայտությունը , որ «Սանիթեքի» պայմանագրի խզումը քաղաքական որոշում է լինելու։ Փոխքաղաքապետը ավագանու անդամին հստակ չպատասխանեց, փոխարենը մտաբերեց «Կիկոսի մահը» հեքիաթը:
«Ստեղ ի՞նչ քաղաքական կոմպոնենտ կա, ձերբակալե՞լ ենք, ի՞նչ ենք արել, ակնհայտ է, որ «Սանիթեքն» իր պարտականություններն ընդհանրապես չի կատարում: Մեկ անգամ էլ ասեմ՝ չգիտեմ՝ սեպտեմբերին պայմանագիրը խզելու եմ, թե ոչ, չգիտեմ՝ «Սանիթեքը» հրաշք է կատարելու սեպտեմբերին, «եթե»-ներով չեմ ուզում, դա «Սանիթեքի» աղբահանության լուծման հետ կապված ի՞նչ առաջընթաց է գրացում, ոչ մի: Հիմա եթե, եթե, եթե, «եթե»-ով լինում է Կիկոսի մահը»:
Ի դեպ, «Սանիթեք»-ն այսօր հայտարարություն էր տարածել ՝ քաղաքապետարանին մեղադրելով միակողմանի գործելաոճի մեջ: Հայտարարության մեջ, մասնավորապես, ասվում էր, որ իրավիճակի հանգուցալուծման երկու առաջարկ է ներկայացվել ` կարճաժամկետ և երկարաժամկետ, սակայն մինչ օրս ընկերության առաջարկները մնացել են անպատասխան: Քաղաքապետի խոսնակ Հակոբ Կարապետյանը ասում է, որ համագործակցության դուռը միշտ բաց է եղել «Սանիթեքի» համար, իսկ առաջարկներն էլ իրականում նոր չեն:
«Սանիթեք»-ի հայտարարության մեջ նաև նշվել էր, թե քաղաքապետարանի կողմից ապօրինի կերպով հեռացվում են ընկերության աղբադույլերը և չեն կատարվում սահմանված վճարումները: Խոսքը Դավիթաշեն վարչական շրջանում նոր աղբամանների տեղադրման մասին էր:
Գործընթացը եղել է օրենքի տառին համապատասխան՝ ասում է քաղաքապետի մամուլի քարտուղարը, հիշեցնելով, Երևան համայնքը և անձամբ Երևանի քաղաքապետն ունեն ուղղակի պարտավորություն՝ ապահովելու Երևանի աղբահանությունը և սանիտարական մաքրումը:
