Ո՞վ և ինչպե՞ս է նպաստում ծնելիության աճին Գոմք համայնքում

Վայոց ձորի մարզի Գոմքի բնակիչ Կարեն Ասլայանը 10 տարի առաջ որոշեց  Գոմքը դարձնել տուրիստական վայր:  Գնեց մեկ ձի, հետագայում մեկը   դարձավ երկու, այսօր արդեն ունի մոտ 20 ձի: Նրանց մասին զբոսաշրջիկները տեղեկանում են  համացանցի միջոցով, այստեղ գալիս են հիմնականում ձիավարության համար:

 

Սկզբնական շրջանում  զբոսաշրջիկները գիշերում էին վրաններում, բայց հետագայում Ասլանյաններն սկսեցին վարկային  միջոցներով ձեռք բերել գյուղի կիսախարխուլ տները, վերանորոգել՝ գրավիչ  պայմաններ ստեղծելով  զբոսաշրջիկների համար:

Կինը՝ Մերի Ջանոյանը,  պատմում է, որ այս ամենը կյանքի կոչվեց միայն ամուսնու լավատեսության  շնորհիվ: Մերին  հերթով թվարկում  է  բոլոր այն երկրների անունները, որտեղից այցելել են: Աշխարահագրությունը բավականին լայն է՝ Կորեայից մինչև Գերմանիա,  Ֆրասնիա… Ասում է, որ զբոսաշրջիկներին ոչ միայն իրենց բնությունն է գրավում է, այլև ընտանեկան ջերմությունն  ու տնական պատրաստված ուտելիքները:

Զրուցակիցս ավելի քան համոզված է, որ ավելի շատ կայցելեն  Գոմք, եթե գյուղ մտնող ճանապարհները բարեկարգ լինեն:

Ասլանյաների ընտանիքը պատրաստվում է   գյուղում գտնվող մեկ այլ կիսախարխուլ,  սակայն ոչ պատահական տուն գնել։ «Այս տանը ապրողը միշտ սիրահարվել է, դրա համար ասում են սիրո տուն։ Ուզում ենք  հենց այդ անվան համար»:  

Գոմք   համայնքը  ժամանակին ադրբեջանաբնակ էր: 90-ականերին այն վերաբնակեցվել է հայերով: Խոշորացումից հետո միացվել է Զառիթափ համայնքին։ Գոմքի վարչական ղեկավար Մխիթար Հովհաննիսյանը «Ռադիլուրի» հետ զրույցում ասում է՝ երբ 2014թ -ին առաջին  Էկո փառատոնը կազմակերպեցին շատերը թերահավատորեն ասում էին, թե Գոմքում ինչպե՞ս պետք  է զբոսաշրջությունը զարգացնել, ով կայցելի գյուղ։ Այսօր շատերն իրենց տները վերանորոգում են, որպեսզի տուրիստներ ընդունեն:  Գյուղապետին խնդրում  ենք մեզ  ուղեկցել մոտակա գեղատեսիլ վայրերից մեկը՝ հասկանալու համար, թե ի՞նչու են աշխարհի տարբեր ծայրերից շատերը նախընտրում այցելել Գոմք:

Մխիթար Հովհաննիսյանն ասում է, որ նման ծրագրեր պետք է շատ իրականացվեն, որպեսզի գյուղացին իր հողը չլքի։ Գյուղի մեկ բնակիչը հավասարազոր է քաղաքում ապրող 150  բնակչի՝ նշում է:

Ու թերևս մեր զրույցը ավարտում ենք լավատեսական նոտայով. Հարցնում եմ՝ ծնելիության  մակարդակը վերջին տարիներին  աճո՞ւմ է։ Պատասխանը առավել քան  հետաքրքիր էր:

Գուղապետ ընտրվելուց հետո ծնելության մակարդակը բարձրացել է, քանի որ մարդիկ հավատ ունեն վաղվա օրվա նկատմամբ՝ ասում է:

Ի դեպ՝ լրագրողական այցը  կազմակերպվել էր  Հայաստանում միգրացիոն քաղաքականության միջազգային կենտրոնի գրասենյակի կողմից: