հրապարակված 10.37
լրացված 18.15
Սահմանային լարվածության հարցին արձագանքելու հորդոր է ուղղել ԵԱՀՄ ՄԽ-ի համանախագահ եևրկրներին ՀՀ ԱԳՆ մամուլի խոսնակ Տիգրան Բալայանը:
Քաղաքագետներն ու վերլուծաբանները ճիշտ են համարում ԱԳՆ քայլը, միևնույն ժամանակ մատնանշում ՀԱՊԿ-ի լռությունը:
«Խստորեն դատապարտելով Ադրբեջանի քայլերը՝ միջազգային հանրության՝ առաջին հերթին ԵԱՀԿ Մինսկի խմբի համանախագահ երկրների ուշադրությունն ենք հրավիրում իրադրության հետագա սրումը կանխելու նպատակով Բաքվին սանձելու և կառուցողական դաշտ բերելու հրատապ անհրաժեշտության վրա».
ֆեյսբուքյան իր էջում գրել է ԱԳՆ մամուլի խոսնակ Տիգրան Բալայանը, շեշտադրելով, որ վերջին շրջանում Ադրբեջանը շարունակաբար գնդակոծում է հայ-ադրբեջանական պետական սահմանը՝ թիրախավորելով և վնաս հասցնելով դրա երկայնքով գտնվող բնակավայրերին, քաղաքացիական հաստատություններին և խաղաղ բնակչությանը։
Բաքվի կողմից իրավիճակի լարմանը միտված գործողությունները, զուգակցվելով ռազմատենչ հռետորաբանության հետ, խաթարում են ԵԱՀԿ Մինսկի խմբի համանախագահ երկրների ու միջազգային հանրության կողմից խաղաղությանը նպաստող մթնոլորտի ձևավորմանն ուղղված ջանքերը՝ հիմնավորում է հորդորը Տիգրան Բալայանը:
Հրադադարի ռեժիմի հերթական խախտում արձանագրվել էր երեկ, ինչի հետևանքով, ցավոք, Հայաստանի հյուսիսարևելյան ուղղությամբ տեղակայված զորամասերից մեկի պատասխանատվության տարածքում, հակառակորդի արձակած կրակոցից, պարանոցի շրջանում ստացած հրազենային վիրավորումից մահացել էր պայմանագրային զինծառայող Հայկազ Մաթևոսյանը:
Վերլուծաբան Մանվել Ղումաշյանը տեղին է համարում ՀՀ ԱԳՆ հորդորը՝ ուղղված միջնորդ երկրներին ու միջազգային հանրությանը, բայց նաև հիմնավորում, թե ինչու է լռություն պահպանում ԵԱՀԿ Մինսկի Խումբը.
«Բանակցությունները պասիվ փուլ են մտել, դրա համար էլ Մինսկի Խումբը պասիվ է»:
Հայ-ադրբեջանական սահմանին արձանագրվող հրադադարի ռեժիմի խախտումներին արձագանքելու հարցում անելիք ունի ՀԱՊԿ կառույցը, որի անդամ է ՀՀ-ն: Սակայն այդ կառույցը լռություն է պահպանում: Հաշվի առնելով, որ ՀԱՊԿ նախագահությունը ՀՀ-ինն է, անգամ կարիք չպետք է լիներ, որ պաշտոնական Երևանը դիմեր, այդ կառույցը պետք է արձագանքեր առանց դիմելու՝ ասում է:
Ադրբեջանագետ Աշոտ Մովսիսյանը պատահական չի համարում Հայաստանի հետ սահմանային ուղղություններով հրադադարի ռեժիմի խախտումները.
«ՀԱՊԿ—ում գոնե հայտարարությամբ անդրադառնան: Ուզում են հասկանալ, թե ՀՀ կդիմի ՀԱՊԿ—ին»:
«Նորավանք» գիտակրթական հիմնադրամի քաղաքական հետազոտությունների կենտրոնի ղեկավար Կարեն Վերանյանը քայլերի դիմելու անհրաժեշտություն է տեսնում:
«ԵԹե ՀԱՊԿ—ը և ԵԱՀԿ հայտարարություններ չանեն, ապա ՀՀ պետք է դիմի այդ կառույցներին»:
Քաղաքագետի կարծիքով, սակայն, միայն հայտարարություններով չպետք է սահմանափակվել, հարկ է որ Բաքվին սանձելու նպատակով պատժիչ գործողություններ հետևեն: Նման իրավիճակի այսօր դժվար թե ականատես լինենք, քանի որ, ըստ Կարեն Վերանյանի,
«Այցերը շատ են տարածաշրջան, նաև պատժամիջոցներ կան ու այդ ֆոնին Ալիևը բնականաբար ավելի սրում է իրավիճակը»:
Սահմանային լարվածության ու ՀԱՊԿ լռության ու ՀՀ անելիքների մասին խոսել է նաև ՀՀ ԱԳ նախարարն Զոհրաբ Մնացականյանը: Մենք համբերատար աշխատում ենք՝ ասել է նա:
Իսկ ՀԱՊԿ-ում Յուրի Խաչատուրովին փոխարինելու հարցում կոնսուլտացիաները շարունակվում են՝ ասում է նախարարը: Մինչ ՀԱՊԿ կառույցի անդամ Հայաստանի անվտանգությանը վերաբերող հարցում քար լռություն են պահպանում ՀԱՊԿ-ն ու ղարաբաղյան խնդրով զբաղվող միջնորդ ԵԱՀԿ ՄԽ-ը, ՆԱՏՕ-Ն արձագանքում է:
ՆԱՏՕ-ն կոչ է անում Հայաստանին և Ադրբեջանին ակտիվացնել ջանքերը ղարաբաղյան խնդրի կարգավորման ուղղությամբ: Հյուսիսատլանտյան դաշինքի գլխավոր քարտուղարի տեղակալ Ռոուզ Գոթեմյոլլերը Բաքվում հստակեցրել է, որ աջակցում են ԵԱՀԿ Մինսկի խմբին և կոչ արել Հայաստանի և Ադրբեջանի կառավարություններին՝ ջանքեր գործադրել հակամարտության խաղաղ լուծմանը հասնելու համար:
