Հասարակություն

Բեյրութում արյունալի բախում է տեղի ունեցել հայերի և արաբների միջև

Լիբանանի Բուրջ Համուդ թաղամասն այսօր արդեն խաղաղ է, ոստիկանական  եւ զինվորական ուժերը լքել են տարածքը:

Մի քանի օր առաջ թաղամասում բախում էր տեղի ունեցել լիբանանցի հայերի եւ արաբների միջեւ, ցավոք, մահվան ելքով:

Երէկ` հինգշաբթի, 6 սեպտեմբերին, Պուրճ Համուտի քաղաքապետութիւնը լիբանանեան լրատուամիջոցներուն յղեց հաղորդագրութիւն մը, որ կը վերաբերի

ուրբաթ, 31 օգոստոս 2018-ին Պուրճ Համուտի մէջ քաղաքացիներու միջեւ տեղի ունեցած բախումին, որուն պատճառով արձանագրուեցան զոհեր եւ վիրաւորներ: Քաղաքապետութիւնը դիտել տուաւ, որ կարգ մը կողմեր դէպքը մեկնաբանեցին մերժելի կերպով եւ զայն չարաշահեցին ստեղծելու մթնոլորտ մը, որուն նկատմամբ կարելի չէ լուռ մնալ:

Առ այդ, Պուրճ Համուտի քաղաքապետութիւնը նաեւ ցաւ կը յայտնէ եւ խստիւ կը դատապարտէ արձանագրուած դէպքը, ցաւակցութիւն կը յայտնէ զոհերուն ընտանեկան պարագաներուն եւ շուտափոյթ ապաքինում կը մաղթէ վիրաւորներուն:

Հաղորդագրութեան մէջ Պուրճ Համուտի քաղաքապետութիւնը լուսարձակի տակ կ՛առնէ հետեւեալ իրականութիւնները.

Ա) Իր ստեղծման օրէն Պուրճ Համուտ ծանօթ է իբրեւ Լիբանանի մանրանկար մը, որ բաց է բոլորին եւ կը հիւրընկալէ բոլորը: Պուրճ Համուտի քաղաքապետութիւնը իր կարգին կ՛ընդգրկէ Լիբանանը բաղկացնող բոլոր շերտերը, ինչպէս նաեւ կը կազմէ բաժնեկցութեան ու համագործակցութեան շրջագիծ մը, որուն ընդմէջէն ազգային համերաշխութիւնը յստակօրէն կ՛երեւայ: Հետեւաբար, բոլոր այն յայտարարութիւնները, վերլուծումներն ու մեկնաբանութիւնները, թէ շրջանը փակ է այս կամ այն կողմին եւ միայն այս կամ այն կողմին բացարձակ իշխանութեան տակ կը գտնուի, չեն համապատասխաներ իրականութեան եւ կտրականապէս մերժելի են:

Բ) Լիբանանի մէջ սուրիացի տեղահանուածներու հարցը ամբողջ երկրին բեռը ծանրացուցած է` հիւսիսէն հարաւ: Լիբանանեան բոլոր շրջանները կը տառապին սուրիացիներու տեղահանութեան հետեւանքներէն` տնտեսական, ընկերային, ծառայութիւններու, ապահովական եւ այլ մակարդակներուն վրայ:

Արդ, Պուրճ Համուտը պատկերելը` իբրեւ շրջան մը, որ միակն է այս իրականութենէն տառապողը, կամ ամէնէն աւելի կամ ուրիշներէն նուազ տառապողը, ամբաստանութիւն մըն է, որ մերժելի է` լիբանանեան բոլոր շրջաններուն եւ անոնց բնակիչներուն վկայութեամբ:

Գ) Ապահովական բախումները եւ միջադէպերը աշխարհի ոչ մէկ վայր կը բացառեն, եւ եթէ նկատի ունենանք, որ Պուրճ Համուտի 2,3 քառ. քմ տարածութեան մէջ կ՛ապրի 180 հազար մարդ, եւ երեք տարիէ ի վեր այս դէպքը առաջինն է, ապա ի յայտ կու գայ, որ նման դէպքերուն համեմատութիւնը բաւական ցած է` այլ շրջաններու հետ բաղդատած: Այս դիտանկիւնէն մեկնելով կը հաստատենք, որ հարցերու ուռճացումը, ինչպէս նաեւ յայտարարութիւններն ու վերլուծումները, որոնք շրջանը կը ներկայացնեն իբրեւ անապահով եւ բռնութեան թատերաբեմ, սխալ մեկնաբանութիւններ են եւ կասկածելի են` իրենց հետապնդած նպատակներով եւ միտումներով: Իսկ բռնութիւն գործելու յանցանքով միայն մարդոց մէկ հատուածին դատապարտումը, անկախ անկէ, որ անիկա իրականութեան չի համապատասխաներ, իր կարգին մերժելի եւ դատապարտելի գրգռութիւն է:

Դ) Պուրճ Համուտի քաղաքապետութիւնը` քաղաքապետով, քաղաքապետական խորհուրդով եւ մարդուժով, յանձնառու էր եւ կը մնայ օրինական ու հաստատութենական իր գործունէութեան:

Քաղաքապետութիւնը` իբրեւ տեղական իշխանութիւն, իր բոլոր պարտականութիւնները կը կատարէ` սահմանուած օրէնքին եւ կանոններու շրջագիծին մէջ: Պուրճ Համուտի քաղաքապետութիւնը յանձնառու է նաեւ շրջանի բոլոր բնակիչներուն նկատմամբ իր պարտականութիւններուն մէջ, առանց խտրութեան` լիբանանցիներուն եւ միւս բնակիչներուն միջեւ: Այս ծիրին մէջ, կը մերժենք այն ոչ անմեղ պահանջները, որոնք կոչ կ՛ուղղեն մեզի` խախտելու օրէնքը եւ շրջանցելու մեր իրաւասութիւնները` հասնելով այնպիսի պարտականութիւններու, որոնք նախարարութիւններուն եւ ապահովութեան ուժերուն վերապահուած են: Կտրականապէս կը մերժենք նաեւ բոլոր այն յայտարարութիւնները, որոնք կոչ կ՛ուղղեն մեզի` որդեգրելու այնպիսի քայլեր եւ կեցուածքներ, որոնք կը յատկանշուին խտրականութեամբ եւ հատուածականութեամբ, ինչպէս նաեւ անիրաւութեամբ, մոլեռանդութեամբ եւ օրինազանցութեամբ:

Ի վերջոյ, Պուրճ Համուտի քաղաքապետութիւնը, վերահաստատելով իր խոր կսկիծը եւ դատապարտումը արձանագրուած դէպքին նկատմամբ, կոչ կ՛ուղղէ բոլոր անոնց, որոնք այս հարցին կ՛անդրադառնան` ըլլալու առարկայական ու ճշգրիտ, հեռու մնալու չափազանցութիւններէ, պոռոտախօսութենէ, ինչպէս նաեւ հատուածական, յարանուանական եւ ցեղապաշտական գրգռութիւններ հրահրելէ:

ՊՈՒՐՃ ՀԱՄՈՒՏԻ ՔԱՂԱՔԱՊԵՏՈՒԹԻՒՆ

Back to top button