Նոր ուսումննական տարում Շիրակի մարզի Կապս գյուղի դպրոցականներին հիասթափութուն է սպասվում: Դպրոցը չի ամրացվել ու չի նորոգվել , շենքը 3-րդ աստիճանի վթարային է, որի հետևանքով ծնողները երեխաներին տանում են հարևան Վահրամաբերրդի դպրոց: Կապսում աշխատատեղեր չկան, բնակչության 40 տոկոսը արտագաղթել է, 70 տոկոսն էլ մեկնում է արտագնա աշխատանքի:
,,Մեր գյուղը շատ սիրուն է, տունն էլ ձորի բերանին, եկեք, տեսեք ինչ սիրուն տեսարան է բացվում,,- երիտասարդ տանտիրուհին խոսելով իր հարազատ բնակավայրի մասին, միաժամանակ առաջնորդեց տան ետնաբակ, որը գրեթե Կապսի ձորի եզրին է: Տունը նոր էին գնել, անասուններ են պահում և երեխաներին մեծացնում:
Ծնողների ցանկությունը մեկն է՝ երեխաների զարգացման համար նպաստավոր պայմաններ ստեղծել: Գյուղում չկա Նախակրթարան, իսկ դպրոցն էլ հիմնանորագման կարիք ունի: Դպրոցի անմխիթար վիճակը ծնողներին ստիպել է երեխաներին տեղափոխել հարևան Վահրամաբերդի դպրոց:
,,Ձմեռը սալյարայուղ կվատենք, որ տաքանանք, պատերը վտանգավոր են, շարժվում են,,, ասաց 9-րդցի Կարինեն:
Չնայած կրթօջախի վատ պայմաններին Կարինեն գերազանց է սովորում, նրա ապագա ծրագրերը կապված են գյուղի հետ, հոգեբան է դառնալու:
Թեև Կապսն ունի 180 տնտեսություն 670 բնակչով, սակայն դպրոց է հաճախում 67 երեխա: Գյուղի բնակչության թիվը նվազել է նաև արտագաղթի հետևանքով: Կապս համայնքի վարչական ղեկավար Աշոտ Միքայելյանը նշեց, որ աշխատատեղեր չլինելու հետևանքով տարիներ առաջ բնակիչները լքել են գյուղը՝ 44 դուռ փակ է:
Գյուղի բնակչության մոտ 70 տոկոսը մեկնում է արտագնա աշխատանքի, նրանց մի մասը չի վերադարձել, իրենց հետ աստիճանաբար տարել են նաև ընտանիքի անդամներին, ապա ազգականներին Կապսում բացի բազալտի հանքից, դպրոցից ու համայնքի վարչական կենտրոնի գրասենյակից՝ այլ աշխատատեղ չկա: Նախկինում աշխատել են ,,Լենհէկ,,-ի կամ ինչպես իրենք են ասում՝ ԼենԳԷՍ-ի ավանի, ինչպես նաև Կապսի ջրամբարի շինարարությունում: Կապսի ջրամբարի կառուցման հետ հիմա էլ են հույսեր կապում:
Բացի արտագնա աշխատանքից գյուղացիները զբաղվում են հողագործությամբ և անասնապահությամբ: Տարին բերքառատ էր, սակայն կրկնակի կարկտահարությունից հետո՝ բերք չհավաքեցին: Գյուղում շուրջ 300 գլուխ խոշոր եղջերավոր անասուն կա: Կաթը կամ հանձնում են կամ մշակում սեփական կարիքները հոգալու համար:
Կապսում ֆերմերային 2 խոշոր տնտեսություն կա, որոնցից յուրաքանչյուրն ունի մոտ 12 գլուխ անասուն: Համայնքի վարչական ղեկավարը նշում է, որ գյուղի զարգացման ծրագրերը կապված են անասնապահության հետ: Հիմա սպասում են կառավարության առաջարկած 5 տոկոսադրույքով վարկերի տրամադրմանը:
Կապսի բնակիչներն ու համայնքի վարչական ղեկավարը գոհ են նոր իրողությունից, լիահույս են, որ հեղափոխությունը կարող է շատ բան փոխել:
Կապսեցիները հավատավոր ժողովուրդ են: Ձորի մյուս եզրին կողք-կողքի 7 մատուռ սրբավայր է կառուցված, յուրաքանչյուրը մի նպատակով ու երազանքով: Շուտով կկառուցվի նաև 8-րդը, որի ուխտը կլինի հեռացած կապսեցիների տուն վերադարձը:
