Հասարակություն

Արմավիր-Երևան երթուղային թնջուկը շարունակվում է

Արմավիր-Երևան սպասարկող ուղևորատար 207 երթուղային տրանսպորտի վարորդները հանգստյան օրերին գործադուլ էին հայտարարել, որի պատճառը նույն երթուղին սպիտակ և դեղին պետհամարանիշերով տրանսպորտային միջոցների ապօրինի շահագործողներն են:

Խնդրին անդրադարձել էր  տրանսպորտի, կապի և տեղեկատվական տեխնոլոգիաների նախարարությունը, ՊԵԿ-ի և ոստիկանության կողմից   հսկողություն  սահմանվել մեքենաների ապօրինի շահագործումը կանխելու վերաբերյալ: Սակայն ապօրինությունները շարունակվում են:

Աքիլեսյան գարշապար դարձած  Երևան-Արմավիր երթուղին շահագործվում է, սակայն  ապօրինիությունները չեն կանխվել: 207 երթուղին սպասարկող  ,,Գալակտիկա տրանս սերվիս,, ՍՊԸ-ի տնօրեն Շուշանիկ Խաչատրյանը նշեց, որ  Արմավիր-Երևան երթուղին երեկ մինչև կեսօր նորմալ հունով աշխատել է, քանի որ ուժեղ հսկողություն էր սահմանված և Արմավիրի ավտոկայանում էին  նախարարության, ոստիկանության աշխատակիցները, իսկ կեսօրից հետո դարձյալ երթուղում հայտնվել  եմ ապօրինի փոխադրողները:


Արմավիրի ավտոկայանում պետեկամուտների աշխատակիցը հետևում է չվացուցակին և ուղևորափոխադրումներին: Շուշանիկ Խաչատրյանն ասաց, որ հետևում են, գրանցումներ անում, բայց սպիտակ պետհամարանիշերով ավտոմեքենաները դարձյալ երթուղի են դուրս գալիս:

,,Գալակտիկա տրանս սերվիս,, ՍՊԸ-ի բողոքն ուղղված է ոչ միայն միջանցիկ, այլ նաև տարանցիկ փոխադրամիջոցների դեմ, որոնց երթուղին անցնում է Արմավիր քաղաքով և կրճատում են ուղևորափոխադրումների քանակը:


Արմավիրի ավտոկայանի պետ Լաուրա Մկրտչյանը կարծում է, որ ինքն արդեն 10 տարի դարձել է այս երթուղու շահագործման թնջուկի քավության նոխազը և ամեն ինչ բարդվում է իր վրա:  Արմավիրի ավտոկայանի պետի ներկայացմամբ՝ ելնելով իր պարտականություններից,  միայն գործադուլի օրերին միջամտել է տարանցիկ  մեքենաներով ուղևորների փոխադրմանը:


207 երթուղային միկրոավտոբուսի ուղևորներից մեկը դժգոհեց մեքենաների սրահի անհարմարավետությունից և  անսարքությունից:

Խնդրի լուծումն առայժմ առկախված է: Տրանսպորտի, կապի և տեղեկատվական տեխնոլոգիաների նախարարի տեղակալ Արմեն Փամբուխչյանը նշեց, որ  անօրինական  փոխադրումներ իրականացնողների գործունեությունը կարգավորող տեսչական մարմինն այժմ վերակազմավորման փուլում է և ներկայում չի կարող միջոցներ ձեռնարկել:


Թնջուկի լուծումը կտա միայն տեսչական մարմինը՝ իրավասությունների սահմաններում:

Back to top button