Հայաստանը խաղում է ոչ թե գլոբալ խաղացողների շահերի բախման, այլ համընկնման կետում՝ այսօր Մոսկվայի անվտանգության համաժողովին հայտարարել է ՀՀ պաշտպանության նախարար Վիգեն Սարգսյանը՝ շեշտելով, որ տարբեր ուղղություններով Հայաստանի գործակցությունը պարադոքս չէ: Հայաստանը կարողանում է համատեղել տարբեր ինտեգրացիոն կազմակերպություններին իր անդամակցությունը։
Պաշտպանության նախարարը հիշեցրել է, որ տնտեսական հարաբերություններում ևս Հայաստանը պահում է բոլորի հետ համագործակցելու քաղաքականությունը՝ համագործակցելով և՛ ԵՄ, և՛ ԵԱՏՄ երկրների, և՛ Իրանի, Չինաստանի, Հնդկաստանի, արաբական ու լատինաամերիկյան պետությունների հետ։
«Ընդ որում՝ մեր գլխավոր սկզբունքը առավելագույնս բաց լինելն ու հարաբերություններում հուսալիությունն է: Մենք մեզ վրա այնպիսի պարտավորություններ ենք վերցրել, որոնց կատարման հարցում վճռականորեն ենք տրամադրված եղել»- ասել է Վիգեն Սարգսյանը:
«Լինելով ՀԱՊԿ հիմնադիր անդամ՝ Հայաստանն այս կազմակերպությունն ու Ռուսաստանի հետ երկկողմ հարաբերությունները դիտարկում է որպես իր անվտանգության ապահովման գլխավոր արտաքին գործոն։ Մենք հպարտ ենք նրանով, որ հետևողականորեն հանդես ենք եկել ու շարունակում ենք հանդես գալ ՀԱՊԿ ուժային բաղադրիչի զարգացման դիրքերից, և որ հենց Հայաստանի նախագահելու տարվա ընթացքում է Հավաքական անվտանգության խորհրդի կողմից հաստատվել մեր կազմակերպության անվտանգության ռազմավարությունը: Հայաստանը շարունակելու է աշխատել ՀԱՊԿ օպերատիվ արձագանքման հավաքական ուժերի կարողությունների զարգացման, ինչպես նաև խաղաղապահ ուժերի կայացման համար։
Միաժամանակ Հայաստանն արդյունավետորեն համագործակցում է ՆԱՏՕ—ի հետ՝ անհատական գործընկերության ծրագրի շրջանակներում։ Հայաստանի խաղաղապահները Լիբանանում և Մալիում ՄԱԿ—ի խաղաղապահ առաքելություններին մասնակցելու զուգահեռ, մասնակցում են նաև ՄԱԿ ԱԽ կողմից արտոնված ՆԱՏՕ—ի առաքելություններում Աֆղանստանում և Կոսովոյում»:
