Երեկ երեկոյան Հյուսիսային պողոտայի «Բուրգեր քինգ» արագ սննդի կետում պայթյուն էր տեղի ունեցել, որի արդյունքում տուժել էր 8 մարդ: Նրանց տեղափոխել են Սուրբ Գրիգոր Լուսավորիչ բժշկական կենտրոն: Տուժածներից 8-ամյա Ռուբինա Մարկոսյանի վիճակն է ծանր եղել: Փոքրիկին վիրահատել են, այժմ բժիշկները նրա վիճակը գնահատում են բավարար:
Տեղեկացնենք նաև, որ րոպեներ առաջ լուրեր տարածվեցին, որ Մոսկվայի «Աֆիմոլլ» առևտրի կենտրոնում գտնվող «Բուրգեր Քինգ» ռեստորանում ծխի պատճառով ավելի քան 6 հազար մարդ է տարհանվել: Հրշեջները ստուգել են տարածքում հրդեհի հնարավոր գաղտնի օջախների առկայությունը: Ստուգումների արդյունքում՝ հրդեհի օջախ չի հայտնաբերվել: Ծխի պատճառ է դարձել ռեստորանում ուտեստի պատրաստման գործընթացը:
Այս պահին ես գտնվում եմ Հյուսիսային պողոտայի «Բուրգեր քինգ» արագ սննդի կետի մոտ, որտեղ երեկ երեկոյան պայթյուն էր տեղի ունեցել: Այսօր սննդի կետը կապարակնքված էր, իսկ շրջակա տարածքը՝ ժապավենապատ: Ըստ նախնական տվյալների՝ սննդի կետի խոհանոցում պայթել էր գարեջրի ճնշումն ապահովող 20 կգ-անոց բալոնը: Պայթյունի հետեւանքով տուժել է 8 մարդ։ Նրանց տեղափոխել են «Սուրբ Գրիգոր Լուսավորիչ» բժշկական կենտրոն: Ուղևորվում եմ բժշկական կենտրոն՝ տեղում պարզելու տուժածների վիճակը:
Մուտքը բժշկական կենտրոն արգելված էր, տուժածների հարազատները հրաժարվում են խոսել։ Վերակենդանացման բաժանմունքի վարիչ Սամվել Կարապետյանը փոխանցեց, որ 8 տուժածներից երկուսը՝ Իրանի քաղաքացիները, դուրս են գրվել, 6-ի վիճակը հսկողության տակ է:
«Լավ է վիճակները, բավարար են: Մեկ 8 տարեկան երեխայի՝ Ռուբինայի վիճակն է միջին ծանրության: Հետվիրահատական շրջանում է: Մեծ վնասում է եղել, բավականին հաջողված վիրահատություն է կատարվել: Վիճակն այս պահին կայուն է, գիտակցություն ունի, կոնտակտի մեջ է մտնում: Հետևանքների մասին դեռ շուտ է խոսել: Իսկ եղբոր մոտ բազմակի քերծվածքների, սալջարդերի քանակն էր մեծ: Նա մի քանի օր կմնա մեզ մոտ»:
Արագ սննդի կետում տեղի ունեցած պայթյունի դեպքի առթիվ հարուցվել է քրեական գործ՝ ՀՀ քրեական օրենսգրքի 279-րդ հոդվածի 2-րդ մասի 2-րդ կետով, այն է՝ անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը , որն անզգուշությամբ վնաս է պատճառել երկու կամ ավելի անձանց առողջությանը։ Ստեղծվել է քննչական խումբ, նշանակվել են փորձաքննություններ։
Պայթած բալոնը երեկ առավոտյան է փոխարինվել նորով: Բալոնները մինչ տեղադրումը պետք է պարտադիր զննում անցնեն, երեկ լրագրողների հետ զրույցում ասել էր ԱԻՆ փոխգնդապետ Տիգրան Կոստանյանը: Արտակարգ իրավիճակների նախարարի մամուլի քարտուղար Նանա Գնդոյանը «Ռադիոլուրին» փոխանցեց, որ պայթած բալոնը լիցքավորվել է «Կոտայք» գարեջուր գործարանի կողմից շահագործվող ածխաթթու գազի ստացման տեղամասում: Բալոնն անցել է փորձաքննություն, տրվել դրական եզրակացություն:
«Նախարարի հանձնարարությամբ պայթյունից հետո կրկին ստուգվել է այդ տեղամասը, նորից տեսել ենք, որ այնտեղ ամեն ինչ նորմալ է: Ամենայն հավանականությամբ այնտեղ բալոնի օգտագործման կանոնների խախտում է եղել»:
Արտակարգ իրավիճակների նախարարությունը հորդորում է տնտեսավարողներին խստիվ պահպանել օրենսդրությամբ սահմանված անվտանգության կանոնները, լինել զգոն։
