հրապարակված 12.15
լրացված 18.02
Սահմանադրական դատարանի նոր նախագահը Հրայր Թվմասնյանն է: Խորհրդարանում այսօր 64 պատգամավոր կողմ է քվեարկել նրա թեկնածությանը: Հրայր Թովմասյանին ՍԴ նախագահի պաշտոնում տեսնելուն դեմ է եղել 27 պատգամավոր: Ազգային ժողովը ՍԴ նախագահ նշանակելու մասին հարցը քննարկել էր երեկ, այսօր կազմակերպվել է քվեարկությունը:
Ընտրվելուց հետո Հրայր Թովմասյանը շնորհակալություն է հայտնել վստահության համար և «Որոգայթ փառաց»-ից մեջբերում անելով՝ խոստացել ամեն ինչ անել Սահմանադրական դատարանի լավ նախագահ լինելու համար:
Իսկ մինչև քվեարկությունը խորհրդարանը հասցրել է քվեարկել երեկ քննարկված բոլոր հարցերն ու սպառել օրակարգը:
Խորհրդարանն այսօր շուրջ 10 րոպե աշխատեց, համարյա 50 րոպե քվեարկեց ու ավարտեց մարտի 20-ին մեկնարկած լիագումար նիստերի աշխատանքը: Քննարկման արագությամբ ԱԺ-ն այս անգամ գերազանցեց իր նախկին բոլոր ցուցանիշները. լիագումար նիստերի ամբողջ օրակարգը սպառեց 1 օրվա ընթացքում: Իսկ օրակարգում 25 հարց էր՝ այդ թվում, օրինակ, Ընտրական օրենսգրքի փոփոխությունները կամ «Միջազգային պայմանագրերի մասին» մայր օրենքը, որին կից նույն փաթեթում 35 օրինագծում առաջարկվող փոփոխություններ են : Միայն այդ փաստի համար «Ելք»-ից Գևորգ Գորգիսյանը հայտարարեց, որ դեմ են քվեարակում:
«Պարոնայք, բերվել է մայր օրենք ՝ հարակից 35 օրենքներով, և սա քննարկվել է 1-ժամյա ռեժիմով: Ես հասկանում եմ, որ այստեղ կան մարդիկ, որոնք չեն ուզում աշխատել, բայց կան մարդիկ որոնք ցանկանում են քննարկել այս ամեն ինչը: Միայն դրա համար մենք այս օրենքի դեմ ենք քվեարկելու»:
Հարցերի քննարկման տևողությունն ու հերթականությունը սահմանում է ԱԺ խորհուրդը, որոշ դեպքերում ՝ քննարկման հատուկ ռեժիմ նախատեսելով : Իսկ ընդհանուր առմամբ հարցերի քննարկման ժամանակը նկատելիորեն կրճատվել է ԱԺ նոր կանոնակարգով: Դրանով սահմանվել է նախագծի քննարկման հստակ տևողություն՝ 1 ժամ, առանձին դեպքերում՝ 90 րոպե:
Նախկինում հարցի քննարկման ժամանակն անսահմանափակ էր : 4 անգամ կրճատվել է նաև հարցը զեկուցողներին հատկացվող ժամանակը՝ 5 րոպե նախկին 20-ի փոխարեն: Հարցերին և պատասխաններին հիմա տրվում է ընդամենը 1, իսկ ելույթներին՝ 2 րոպե՝ նախկին 10-ի փոխարեն:
Այս փոփոխությունը շատ տեսանելի է համեմատության մեջ: Նախորդ գումարման Ազգային ժողովը հակառակ ծայրահեղության մեջ էր՝ քննարկումների չսահմանփակվող տևողությունը երկարաձգում էր խորհրդարանի աշխատանքը: Օրինակ, միայն ՀՀ գլխավոր դատախազի հաղորդումը նախորդ գումարման խորհրդարանը քննարկել է գրեթե մի ամբողջ քառօրյա կամ համարյա 4 օր: Այս գումարման խորհրդարանը 1 օրում կարողանում է սպառել ամբողջ օրակարգը ու սրանից դժգոհ է հատկապես խորհրդարանական ընդդիմությունը:
Խորհրդարանն այսօր ընդունեց երեկ քննարկված օրակարգային բոլոր հարցերը ՝ բացի մեկից: «2008-ի մարտի 1-2-ի իրադարձությունների վերաբերյալ» «Ելք»-ի հայտարարության նախագիծը մերժվեց ձայների 56 դեմ, 9 կողմ, 7 ձեռնպահ հարաբերակցությամբ: Քվեարկությունից առաջ «Ծառուկյան» խմբակցության պատգամավոր Գևորգ Պետրոսյանը հայտարարեց , որ կիսում են Մարտի 1-ի զոհերի հարազատների վիշտը, բայց վերապահումներ ունեն նախագծի իրավական հիմնավորումների վերաբերյալ:
«Ելք»-ն առաջարկում էր հայտարարությամբ դատապարտել մարտի 1-2-ի իրադարձությունները , հորդորել դատախազությանը վերնայել մեղադրական դատավճիռները և առաջիկայում օրենսդրական փաթեթ մշակելու պարտավորություն ստանձնել , որով «արժանապատիվ փոխհատուցում» կտրվի 10 զոհերի հարազատներին»։ ՀՀԿ-ական Գևորգ Կոստանյանը կարծում է, որ ընդդիմություն առաջարկը մարտի- 1-ին վերաբերող մտահոգությունները չի փարատելու:
Նախագծի քվեարկության ժամանակ ուշագրավ միջադեպ արձանագրվեց. քանի որ բոլոր նախագծերը կողմ քվեարակությամբ ընդունվում էին, որոշ Հանրապետականներ «կողմ»-ի կոճակը սեղմեցին նաև Մարտի 1-ի նախագծի քվեարակության ժամանակ: Լուսատախտակին արձանագրվեց 14 կողմ պատկերը , ԱԺ նախագահությունը պարզաբանեց՝ որոշ ՀՀԿ-ականներ շփոթել են, նախագծին կողմ են միայն Ելքի 9 պատգամավորները:
