Խորհրդարանի փոքրաթիվ խմբակցությունները խնդիր են տեսնում ԱԺ մշտական հանձնաժողովներում իրենց ներկայացվածության հարցում:
ՀՅԴ-ն առաջարկում է վերանայել ԱԺ կանոնակարգի այն դրույթը, ըստ որի՝ մշտական հանձնաժողովում տեղերը բաշխվում են խմբակցություններում ընդգրկված պատգամավորների թվի համամասնությամբ:
Սահմանումը, կարծում են, խախտում է փոքրաթիվ խմբակցությունների իրավունքը: Մեծամասնությունը առաջարկին դեմ չէ, բայց թաքնված վտանգներ է տեսնում:
Դաշնակցությունը խորհրդարանի ամենափոքրաթիվ խմբակցությունն է, ունի յոթ պատգամավոր, իսկ ԱԺ մշտական հանձնաժողովների թիվը ինն է: Սա նշանակում է, որ ՀՅԴ-ն երկու հանձնաժողովում ներկայացուցիչ չունի: ԱԺ կանոնակարգում գրված է, որ մշտական հանձնաժողովներում տեղերը բաշխվում են ՝ ըստ խմբակցությունների պատգամավորների թվի համամասնության:
«Եթե համամասնությամբ եք բաժանում, ուրեմն դաշնակցության համամասնությունը 0.5 պետք է լինի: 0.5 մարդ ո՞նց բերեմ ես ձեզ»:
Արմեն Ռուստամյանը ԱԺ կանոնակարգում առաջարկում է փոփոխություն անել ու ամրագրել. եթե խմբակցության անդամների թիվը փոքր է մշտական հանձնաժողովների ընդհանուր թվից, ապա խմբակցությունն իրավունք ունի իր անդամին ներկայացնելու մեկից ավելի մշտական հանձնաժողովներում: Ըստ առաջարկի՝ նույն պատգամավորը կարող է լինել մինչև 3 մշտական հանձնաժողովի անդամ:
«Մենք ասում ենք՝ ինչ ուզում եք արեք, ապահովեք հանձնաժողովում մեր ներկայության հարցը: Հիմա երկու հանձնաժողովում 0 ներկայություն եք ապահովում, բայց մեր ներկայությունը խորհրդարանում 0 չէ»:
Զրո ներկայությունը չի ողջունում նաև կառավարությունը: Արդարադատության փոխնախարարն ասում է՝ իրենք էլ են կարծում, որ ԱԺ բոլոր խմբակցությունները պետք է ներգրավված լինեն խորհրդարանական բոլոր հանձնաժողովների աշխատանքում, բայց առաջարկում են չմոռանալ մեծամասնության իրավուքները:
«Կայուն մեծամասնություն ունեցող ուժը պետք է համամասնորեն ունենա նաև անդամներ մշտական հանձնաժողովներում, չի կարող այնպես լինել, որ մշտական հանձնաժողովներում ԱԺ կայուն մեծամասնություն ունեցող ուժը չունենա նույն մեծամասնությունը: Հիմա եթե մենք բացենք բոլոր հանձնաժողովների կազմերը, կտեսնենք, որ այդ համամասնությունը պահպանված է, սակայն եթե Եվրաինտեգրման հանձնաժողովում ավելացնենք մեկ տեղ ՀՅԴ-ի համար, ապա արդեն մյուս խմբակցությունների ներգրավվածությունը կհավասարվի Հանրապետականի անդամների թվին: Համամասնությունը կխախտվի»
«Ոչ մի համամասնություն էլ չի խախտվի, ՀՀԿ-ն այնքան մանդատ է ստացել, ժողովուրդն այնքան ձայն է տվել Հանրապետականին, որ անարգել կարող են աշխատել»:
«Ելք»-ից Էդմոն Մարուքյանն իր օրիանակով է պատասխանում նաև հանձնաժողովի նախագահ Գևորգ Կոստանյանի այն հարցրին, թե հեղինակներն ինչպես են պատկերացնում նույն պատգամավորի մասնակցությունը միաժամանակ 2 հանձնաժողովի նիստին. նախորդ գումարման խորհրդարանում 3 հանձնաժողովի անդամ է եղել ու ավելի արդյունավետ է աշխատել: Կոստանյանն էլ Մարուքյանին Զեյնալյանի օրինակն է հիշեցնում. պետաիրավականի անդամ չէ, բայց ավելի ակտիվ, քան հանձնաժողովի անդամները, մասնակցում է նիստերին:
«Զեյնալյանը մեր դասական օրինակն է, բացի քվեարկությունից բոլոր իրավունքներից օգտվում է»
Ամենակարևրն էլ հենց քվեարկությունն է՝ հակադարձում է Արմեն Ռուստամյանն ու արդեն իր օրինակը բերում:
Սկզբունքային թվացող վեճը հեշտ հանգուցալուծում ունեցավ. կոալիոցոին գործընկերներն այնուամենայնիվ ընդհանուր հայտարարի եկան. Մեծամասնությունը առաջարկեց մինչև 2 ամսով հետաձգել հարցի քննարկումը, լրամշակել այն: Նախագծի հեղինակը համաձայնեց առաջարկին:
