Արմավիրի մարզում աղբի վերամշակման գործարանի կառուցման չհաջողված փորձը այս տարի իրականություն կդառնա չեխ նոր ներդրողների շնորհիվ: Էլեկրոմոնտաժ Սիկորա ընկերությունը նախագծի իրականացման համար ներդնելու է 100 մլն եվրո: Աղբը տեսակավորվելու և վերամշակվaելու է առանց բնապահպանական խնդիրներ հարուցելու:
Երկու տարի շարունակ Արմավիրում քննարկվում է աղբի վերամշակման գործարան կառուցելու հարցը, որն իրականացվելու է հայ-չեխական համագործակցության գործարար ծրագրի շրջանակներում: Անցած տարի ծրագրի իրականացման Գրինէկո-Կասե ընկերության ներկայացուցիչները եկան Արմավիր, ուսումնասիրեցին, համաձայնություն ձեռք բերեցին և որոշեցին մայիսից սկսել գործարանի կառուցումը, որն անկատար մնաց:
Տարվա սկզբին նոր բանակցությունների արդյունքում Արմավիր քաղաքում աղբի վերամշակման գործարանի կառուցումը ստանձնել է Չեխիայից «Էկլեկտրոմոնտաժ Սիկորա» ընկերությունը, որի ներկայացուցիչներն արդեն 3 օր ուսումնասիրում են քաղաքի աղբավայրի տարբեր տարածքները: Արտահագուստով դիմակավորված ճարտարագետները որոշում են աղբի տեսակարար կշիռը՝ ինչ խորության վրա, ինչ խտությամբ, ինչպիսի աղբ կա:
Աղբի վերամշակման համար ներդրողներից պահանջվում է ուսումնասիրել և տեսակավորել, ինչպես նաև հայտնաբերել թունավոր նյութեր պարունակող աղբը, իրականացնել երկրաբանական հետազոտություն՝ աղբավայրից ընդերք ներթափանցող ջրերի վերաբերյալ:
Եվրոպացի մասնագետներն հատուկ ուշադրություն են դարձնում բնապահպանական և էկոլոգիական խնդիրներին: «Էկլեկտրոմոնտաժ Սիկորա» ընկերության տնօրեն Պետրեմ Սիկորան հավաստիացնում է, որ նախագծի իրականացմամբ բնապահպանական, էկոլոգիական խնդիրներ չեն ստեղծվի, թունավոր նյութերի և գազերի արտանետում չի լինի:
Վերլուծությունից ու փորձագիտական եզրակացությունից պարզ կդառնա ինչպիսի տեխնոլոգիաներ են կիրառելու աղբի վերամշակման համար:
Աղբի վերամշակումից ստացվելու է էլէկտրաէներգիա, ջերմություն, նավթ: Մետաղական ջարդոնները, որոնց մեծ մասը տրանսպորտային միջոցների կմախքներ են, կկտրրվեն, կմամլվեն և կհանձնեն մետաղաձուլարան: Չեխ ներդրողները աղբավայրը համեմատել են ոսկու հանքի հետ, որից շատ ավելի մեծ եկամուտ կստանան: Նախատեսվել է տարեկան վերամշակել 300 հազար տոննա աղբ: Մոտավոր հաշվարկով Արմավիրի աղբավայրում 70-120 հազար տոննա աղբ է կուտակվում: Արմավիրի մարզպետ Աշոտ Ղահրամանյանն ասաց, որ գործարանում կվերամշակվի նաև Արագածոտնի մարզի աղբը:
Նախագծի իրականացման համար նախատեսվել է 100 մլն եվրո ներդրում: Աղբարկղերը, աղբահավաք մեքենաները ներկրվելու են Եվրոպայից, աղբը տեսակավորվելու է տարբեր աղբարկղերում: Այս նպատակով հանրության կտեղեկացվի իրազեկման տարբեր միջոցներով:
Աղբի վերամշակման գործարանի կառուցմամբ աղբից ամբողջությամբ կմաքրվեն ոչ միայն աղբավայրերը, այլև բնակավայրերը: Ներդրողները նախատեսել են ծրագիրն իրականացնել 2 տարում:
