Աղբահանության պատշաճ իրականացման և աղբը թափելու մշակույթ ձևավորելու մասին Արմավիր քաղաքում շատ է խոսվել:
Քաղաքում պետք է կառուցվի աղբի վերամշակման գործարան, աղբի տեսակավորման համար տեղադրվելու են տարբեր գույնի աղբամաններ և կարգավորվելու է աղբահանությունը:
Սակայն սա ապագայի խնդիր է, մինչ այդ Արմավիր քաղաքի ավագանին որոշել է կառավարել աղբը թափելու կարգը և չսահմանված տեղում աղբ թափելու համար քաքացիներին տուգանել 30000 դրամ:
Արդեն մեկ ամիս Արմավիր քաղաքի խիտ բնակեցված թաղամասերի շուրջ 10 աղբավայր գտնվում է քաղաքապետարանի տեսահսկողության տակ: Աղբը չսահմանված վայրերում թափող քաղաքացիների համար կիրառվում է վարչական իրավախախտումների վերաբերյալ օրենքով սահմանված խստագույն պատիժը՝ նվազագույն աշխատավարձի 30-ապատիկի չափով, այսինքն՝ 30 հազար դրամ:
Մեկ ամսվա ընթացքում արդեն 67 քաղաքացի հայփոստի բաժանմունքների միջոցով ստացել է ծանուցում՝ տույժը վճարելու մասին: Քաղաքացիներն անակնկալի են եկել, քանի որ իրազեկված չեն եղել ավագանու այս որոշման մասին:
Արմավիր քաղաքի ավագանու հերթական վերջին նիստի ընթացքում քաղաքապետ Ռուբեն Խլղաթյանը բարեկարգում տնօրինության ղեկավարի Լևոն Գրիգորյանից հետաքրքրվեց տեսանկարահանող սարքերի արձանագրած խախտումների և տույժերի վճարման մասին՝ 67-ից 20-նն է վճարվել:
Տեսանկարահանող սարքերը միացված են մեկ մոնիտորին, որը վերահսկում է քաղաքապետարանի ներքին աուդիտի բաժնի պետ Տիգրան Հակոբյանն ու պայմանագրային աշխատող իր 16 ամյա աղջիկ Անի Հակոբյանը: Մոնիտորի միջոցով հետևում են աղբահանությանն և աղբը թափողներին:
Նորագույն տեխնոլոգիաների միջոցով ստուգվում է աղբի տեսականին և խախտում թույլ տված քաղաքացիների նկարները հանվում են, ներկայացնում վարչական տուգանքի, սակայն հստակեցված չէ տեսակավորված աղբի տուգանքի չափը: Չեն տուգանվում հացն ու հացաբուլկեղենի մնացորդների տոպրակները աղբարկղերի մոտ տեղադրող քաղաքացիները:
Արմավիրի քաղաքապետարանի վարչական հանձնաժողովի նախագահի տեղակալ, իրավաբանական բաժնի պետ Նորայր Դանիելյանը չժխտեց, որ իրենք կիրառում են վարչական իրավախախտումների մասին օրենքի 43.1 հոդվածի 5-րդ մասով նախատեսված պատիժը:
Առայժմ տուգանված քաղաքացիները հիմնականում մեքենաներից աղբը դեպի աղբարկղեր շպրտած քաղաքացիներն են: Տեսանկարահանող սարքերի միջոցով ճշտվել են մեքնաների համարները և ներկայացվել տույժի: Այս կերպ է տուգանվել Ազատ կարապետյանը, ով որոշել է դատարանի միջոցով չվճարել տուգանքը՝ ունենալով իր հիմնավորումը:
Քաղաքացին ապրում է Հունան Ավետիսյան փողոցի առանձնատներից մեկում: Նա նշեց, որ այդ հատվածում աղբահանությունը ուշ է կատարվում և իր կենցաղային աղբը թափել է ավելի հեռու, ճանապարհին գտնվող աղբարկղում:
Քաղաքացին մեջբերում է նաև վարչական իրավախախտումների վերաբերյալ օրենքի հաջորդ կետերը, որոնք վերաբերում են պաշաճ աղբահանութուն կատարելուն և կառույցի պատասխանատվությանը:
Արմավիր բարեկարգում տնօրինության տնօրեն Լևոն Գրիգորյանը նշեց աղբահանության համար գործում է 3 աղբատար մեքենա, 3 տրակտոր, 1 Զիլ մակնիշի բեռնատար և 1 բարձիչ մեքենա, որն այնքան էլ բավարար չէ քաղաքի աղբահանության համար: Առանձնատներից աղբահանությունն իրականացվում է 7-10 օրվա ընթացքում , հսկիչի ուղեկցությամբ՝ գանձումներ կատարելով:
Մինչդեռ Ազատ կարապետյանը հակառակն է պնդում է, որ աղբահանություն ավելի ուշ է կատարվում: Ազատ կարապետյանը աղբի տուգանքը որոշել է վիճարկել դատարանում:
Արմավիր քաղաքի 10 աղբավայրում տեղադրված տեսախցիկների առկայությունից քաղաքացիներն ավելի զգուշավոր են դարձել, թեպետ տեղյակ չեն տեսահսկման հետևանքների մասին: Արմավիրի քաղաքապետ Ռուբեն Խլղաթյանը տեղեկացրեց, որ ևս 14 տեսահսկող սարքավորում կտեղադրվի հաջորդ տարում:
«Մենք այս ծախսերին ավագանու հետ գնացել ենք, ոչ թե քաղաքացիներին վնաս հասցնելու համար, այլ մեր քաղաքացիներին սովորեցնելու, որ աղբը աղբամանի մեջ թափեն»:
Արմավիրի կենտրոնական փողոցներում օրվա ցերեկային ժամերին տարբեր վայրերում տեղադրված աղբարկղերը կիսադատարկ էին, շրջակայքը՝ մաքուր: Սակայն լուծված չէ քաղաքի փողոցներում աղբամանների տեղադրման հարցը: Քաղաքացիները ձեռքի աղբը նետում են փողոց, առվի մեջ կամ ծառերի տակ, իսկ ավելի քաղաքավարիները՝ պահում մինչև աղբարկղ տեսնելը:
