2018 թվականին վարչապետ լինելու հարցը ՀՀ նախագահ Սերժ Սարգսյանի հետ չի քննարկվել, Կարեն Կարապետյանն էլ փոխվարչապետ աշխատելու առաջարկ չի ստացել՝ այսօր ամփոփելով գործունեության մեկ տարին հայտարարել է վարչապետ Կարեն Կարապետյանը:
Նա մեկ անգամ ևս ընդգծել է, որ պատրաստ է շարունակել աշխատանքը վարչապետի պաշտոնում: «Ի՞նչ եմ ուզում անել՝ ծառայել մեր երկրին: Վստահ եմ, որ հաստատ կարող ենք լավ երկիր ունենալ՝ տրամաբանական զարգացող»,- ասել է ՀՀ վարչապետը:
Երկու հանդիպում մեկ տարվա ընթացքում ու խոստովանություն՝ ԶԼՄ ներկայացուցիչներին՝ վարչապետ Կարեն Կարապետյանից. «Բավականին երկար ժամանակ է՝ չենք հանդիպել, նույնիսկ կարոտի զգացմունք ունեմ ես, վստահ չեմ՝ դուք նույնպե՞ս կարոտել եք»:
Կառավարության ղեկավարն այսօր ամփոփեց գործունեության մեկ տարին: Նախ՝ Կարեն Կարապետյանին ամենաշատը տրվող հարցերից մեկին այսօր անդրադարձավ վարչապետն ու խոստացավ՝ թեմային այլևս չի անդրադառնալու:
2018թ ապրիլից հետո կշարունակի պաշտոնավարել Կարեն Կարապետյանը թե՞ ոչ, ի՞նչ է պայմանավորվել կառավարության ղեկավարը Հայաստանի նախագահի հետ:
Կարեն Կարապետյանը մեկ անգամ ևս հստակեցրեց՝ ՀՀԿ-ին անդամակցել է գիտակցաբար:
Մեկ ու կես ժամ՝ տնտեսության ամփոփ պատկերը` թվերով, 19 էջում ու հավելվածներում լրատվամիջոցների ներկայացնելու համար։ Գրեթե բոլոր ուղղություններում վերջին մեկ տարում, ԱՎԾ տվյալներով, աճ է գրանցվել։ Խոստացված ներդրումները կապահովեն մինչև տարեվերջ: Առաջիկա տասը օրվա ընթացքում ներդրողների ակումբի անդամների մասին նույնպես կհայտարարեն:
Վիճակագրական տվյալները հուսադրող են, քաղաքացիների բարեկեցությունն ավելացել է 4 տոկոսով, ավտոմեքենա, լվացարան, կահույք ու անկողնային պարագաներ. ներմուծման աճն ավելացել է անգամ երկնիշ տոկոսով։ Տնտեսության վիճակի մասին Կարեն Կարապետյանի բնութագրումը փոխվել է՝ նախկինում հայտարարում էր, որ վիճակը ծանր է, այսօր՝
«Կառավարելի ու հեռանկարային եմ գնահատում»:
2018-ի բյուջեն կազմվել է՝ ելնելով իրավիճակից՝ ասաց Կարեն Կարապետյանը՝ նշելով՝ թոշակ ու աշխատավարձ չի բարձրանա, սակայն, չի նշանակում, որ քաղաքացիների կյանքի որակը չի փոխվի:
Քաղաքացիներից փորձեցինք պարզել՝ ինչ է փոխվել նրանց կյանքում վերջին մեկ տարվա ընթացքում:
Հաջորդ տարի պետական ապարատում 5500 աշխատատեղ կկրճատվի: Ունի՞ արդյոք Հայաստանի աշխատաշուկան նման քանակի գործազուրկի աշխատանքով ապահովելու հնարավորություն, սոցիալական ի՞նչ ծրագրեր կան նրանց համար կառավարության ղեկավարից հետաքրքրվեց «Ռադիոլուրը»:
Պարզվեց՝ պետական ապարատը ուռճացված է, կրճատվելու են ոչ բարձրակարգ մասնագետները, դրանց մեջ կլինեն նաև ծույլ պաշտոնյաները՝ խոստացավ Կարեն Կարապետյանը:
«Լավ երկիր չենք կարող ունենալ, եթե լավ կառավարում չունենանք»,- ասաց Կարեն Կարապետյանը: Խոստացավ՝ «աշխարհը շուռ տալու ենք, լավ երկիր ունենալու ենք»։
