Անի Մինասյան
«Ռադիոլուր»
Վաշինգտոնը կասկածում է ՏՏ ոլորտում ռուսական ամենահայտնի ընկերություններից մեկին՝ «Կասպերսկի Լաբորատորիային», Ռուսաստանի անվտանգության դաշնային ծառայության հետ գաղտնի կապերի մեջ։
Դրա պատճառով՝ ԱՄՆ կառավարությունը սահմանափակել է Կասպերսկու արտադրանքի վաճառքը՝ անվտանգության նկատառումներից ելնելով: Ավելի ուշ ԱՄՆ ներքին անվտանգության դեպարտամենտը հայտարարություն տարածեց։
«Այլևս ռիսկային է վստահել Կասպերսկուն, քանի որ Ռուսաստանի կառավարությունը կարող է օգտագործել դաշնային տեղեկատվական համակարգեր Կասպերսկու արտադրանքներին տրամադրած մուտքը, ինչն ուղղակիորեն ազդում է ԱՄՆ ազգային անվտանգության վրա»:
Այս սկանդալի ֆոնին՝ լաբորատորիայի ղեկավարը՝ Եվգենի Կասպերսկին համաձայնել է ԱՄՆ կառավարությանը տրամադրել իրենց ծրագրերի գաղտնագրերը, ինչպես նաեւ բացատրություն տալ Սենատում։
«Կասպերսկու լաբորատորիայի» գործունեության վրա ո′չ Ռուսաստանի և ո′չ էլ այլ երկրի կառավարություն որևէ ազդեցություն չի կարող ունենալ՝ «Ռադիոլուրին» ասաց «Կասպերսկի Լաբորատորիային» նախավաճառքի աջակցության բաժնի ղեկավար Բուլատ Սիրաևը:
Սա առաջին դեպքը չէ, երբ մեղադրում են «Կասպերսկի լաբորատորիային»: Ըստ մեդիա փորձագետ Սամվել Մարտիրոսյանի՝ սա պարզապես «աշխարհաքաղաքական խաղ» է:
Սահմանափակումներից հետո «Կասպերսկի Լաբորատորիան» հայտարարել է, որ քաղաքական հակամարտության պատճառով հայտնվել է անհարմար դրության մեջ և երկու կողմերը փորձում են ընկերությանն օգտագործել որպես խաղաքարտ: Կրեմլը հայտարարել է, որ ԱՄՆ որոշումը քաղաքականացված է:
