Հանրային քննարկման է դրվել քրեակատարողական համակարգում 2018-2038 թթ. ռազմավարության ծրագիրը:
Ի՞նչ բարեփոխումներ կբերի այն: Այս հարցերի շուրջ այսօր խոսել են արդարադատության փոխնախարար Սուրեն Քրմոյանն ու ՔԿՀ-ներում հասարակական վերահսկողություն իրականացնող դիտորդների խմբի անդամ Ռոբերտ Ռևազյանը:
Նրանց որոշ դիտարկումներն ու գնահատականները՝ «Ռադիոլուրի» ռեպորտաժում:
ՔԿՀ-ներում մոտ 20 տարվա ռազմավարությունը ներառում է մոտ 9 ուղղությամբ բարեփոխումների իրականացում: Գործողությունները ընդգրկում են օրենսդրական բարեփոխումներ, կոռոպցիոն ռիսկերի նվազեցմանն ուղղված միջոցառումներ, քրեակատարողական ծառայողների որակավորման-վերապատրաստման խնդիրներ, շենքային պայմաններ եւ այլն:
Այս ամենի մասին բավականին մանրակրկիտ խոսելով՝ արդարադատության փոխնախարար Սուրեն Քրմոյանը շեշտեց, թե համակարգի խնդիրների լուծումը բացի քաղաքական կամքից պահանջում են նաեւ ֆինանսական միջոցներ: Դրա համար էլ 20 տարվա ռազմավարության մեջ կան ե՛ւ երկարաժամկետ, ե՛ւ կարճաժամկետ լուծումներ:
Բուժծառայություններ, քրեակատարողական աշխատողների որակավորում, աշխատավարձերի խնդիր, կառավարման փոփոխություններ, կոռուպցիոն ռիսկերի նվազեցում՝ այս ամենը 20 ամյա ռազմավարությունում հաշվի են առնվում՝ ասաց արդարադատության փոխնախարարը:
Համակարգի փոփոխություններն անհրաժեշտ է համարում ՀՔԱ Վանաձորի գրասենյակի ղեկավար Արթուր Սաքունցը: Նրա կազմակերպությունը ռազմավարության մեջ ներառելու համար առաջարկներ է ներկայացրել: Նաեւ՝ մտահոգություններ հայտնել:
Այդ տեսանկյունից նա կարեւորում է նախկին նման ծրագրերին գնահատական տալը, ինչը, ըստ նրա, չի արվել: Այնինչ՝ գնահատելը հարկավոր է դասերը հաշվի առնելու համար: Ըստ Սաքունցի՝ 20-ամյա ռազմավարությունը նպատակ ունի նաեւ նվազեցնել կոռուպցիոն ռիսկերը, մինչդեռ, այնտեղ վերլուծություններ չկան այդ ուղղությամբ նախկին ծրագրերի վերաբերյալ, ինչը նույնպես կարեւոր է:
Բանախոսը նաեւ 20 տարվա ռազմավարությունը բավականին հավակնոտ համարեց, քանի որ չկա երաշխիք, որ դրա շարունակականությունը կապահովվի: Արթուր Սաքունցը գնահատմամբ՝ ոլորտում հաջողություններ կան, կան ուղղություններ, որոնք շատ լավ ներկայացված են նոր ռազմավարության մեջ, բայց կան նաեւ բացեր:
Օրինակ՝ անդրադարձ չկա, թե ինչպե՞ս պետք է լուծել քրեակատարողական հիմնարկներում գոյություն ունեցող չգրված օրենքների խնդիրը: Կազմակերպությունն իր առաջարկները ձեւակերպելու եւ ներկայացնելու է ԱՆ-ին՝ տեղեկացրեց ՀՔԱ Վանաձորի գրասենյակի ղեկավարը:
