Անի Մինասյան
«Ռադիոլուր»
Այսօր Երեւանի պետական համալսարանի արեւելագիտության ամբիոնի ուսանողները հնարավորություն ստացան լսելու եւ հարցեր ուղղելու Թուրքիայի մեջլիսի հայազգի պատգամավոր Գարո Փայլանին: Հարցուպատասխանից հետո ուսանողները հերթ էին կանգնել Փայլանի հետ սելֆի անելու համար:
Փայլանը շատ անմիջական էր և սիրով պատասխանեց հնչած բոլոր հարցերին: Փայլանը շատ ոգևորված էր: Առաջարկում եմ լսել, թե ինչպես է սկսել իր խոսքը հայազգի պատգամավորը:
Հանդիպման ընթացում ուսանողները հնարավորություն ունեցան իրենց հարցերն ուղղել Փայլանին: Արդյո՞ք մոտ է այն օրը, որ Արարատի գլխին հայկական դրոշը կծածանվի: Փայլանն ասաց, որ ամենակարևոր ճանապարհը ժողովրդավարական Թուրքիա ու ժողովրդավարական Հայաստան ունենալն է աշխարհում: Նրա խոսքով՝ 25 տարուց ավելի է՝ հայ-թուրքական սահմանը փակ է, և քանի դեռ Թուրքիան ղեկավարում են ազգայնականները, ապա ոչինչ չի փոխվի:
Հարցեր եղան նաև Թուրքիայի ներքաղաքական կյանքին վերաբերող, Փայլանն ասաց, որ հանրաքվեում քիչ տարբերությամբ հաստատվել է Էրդողանի դիկտատուրան, սակայն ոչ բոլոր թուրքերն են, որ կողմն են այդ արդյունքներին: Ինքն ունի թուրք մի շարք առաջադեմ, ժողովրդավարական ու արդար ընկերներ: Դրսում թվում է, թե Թուրքիայում ամեն ինչ հաջող է, ժողովուրդն աջակցում է Էրդողանին։ Սրա պատճառն այն է, որ երկրում չկա ազատ մամուլ՝ իրական պատկերը ներկայացնելու համար։ Իրականում դժգոհությունները շատ են։
Հանդիպումից հետո Գարո Փայլանը պարգեւատրվեց Երևանի պետական համալսարանի Ոսկե մեդալով:
