2040թ Հայաստանի բնակչությունը դարձնել 4 մլն. արդեն երկրորդ անգամ Հայաստանի նախագահն այս թիվն է հնչեցնում: Նա առաջնահերթն է համարում Հայաստանում բնական աճի տեմպերի ավելացումը, արտագաղթի և ներգաղթի հարաբերակցության էապես վերափոխումը: Մեր երկրից, պաշտոնական տվյալներով, վերջին մի քանի տարիներին հեռացել է մոտ 240 հազար քաղաքացի: «Նորավանք» գիտակրթական հիմնադրամը պատճառներն է հետազոտել: Փորձագետները կարծում են՝ մեր երկրից հեռացածները Հայաստան կվերադառնան, եթե մի քանի տարի շարունակ երկնիշ տնտեսական աճ գրանցվի: Նման աճի մասին, սակայն, իշխանական ատյաններում լռում են:
Սյունիք, Տավուշ, Լոռի, թե Շիրակ. Հայաստանի բոլոր բնակավայրերում խնդիրները գրեթե նույնն են՝ առաջին սանդղակում սոցիալական հարցերն են: Այստեղ անհամբեր սպասում են, թե ում մոտ են մեկ անգամ ևս իրենց համար կենսական նշանակություն ունեցող հարցերը բարձրացնելու:
Տարեցտարի Հայաստանում սրվում են ժողովրդագրական խնդիրները՝ ասում է զրուցակիցս՝ տնտեսագետ Բագրատ Ասատրյանը, ու ահազանգում՝ կորուստներն անդառնալի կարող են լինել: Վիճակը սարսափելի է
«Բացի Երևանից, Հայաստանի բնակչությունը բոլոր մարզերում նվազում է ՝ ավելի արագ տեմպերով Շիրակում և Լոռիում»:
Բնակչության աճի նվազման տեմպերով Լոռիին ու Շիրակին հաջորդում են Տավուշը, Սյունիքը, Վայոց ձորը: Սա արդեն ահազանգ է՝ նաև անվտանգության տեսանկյունից:
«Կրիտիկական ենթակառուցվածք». Հայաստանի ժողովրդագրական վիճակի բնորոշումն է՝ ըստ «Նորավանք» գիտակրթական հիմնադրամի: Փոխտնօրեն Սամվել Մանուկյանը պարզաբանում է՝ ժողովրդագրական վիճակի հետագա վատթարացումը կարող է կոլապսի բերել ՀՀ պետականությունը, տնտեսությունն ու ազգային անվտանգությունը: Իսկ այն, որ Հայաստանից ավելի շատ գնում են, քան հետ գալիս, պաշտոնական վիճակագրությունն է արձանագրում.
«2010-2016թթ ամեն տարի Հայաստանից մեկնում է մոտ 42 հազար քաղաքացի»:
Հետազոտական տվյալները փաստում են՝ Հայաստանից հեռանում են կամ աշխատատեղերի բացակայության, կամ ցածր աշխատավարձի պատճառով: ԱՎԾ տվյալները համադրելով՝ «Նորավանք» գիտակրթական հիմնադրամի փոխտնօրեն Սամվել Մանուկյանը նշում է՝ մեր երկրում բարձր աշխատավարձ ստանում են չորս ոլորտներում՝ ֆինանսական, հեռահաղորդակցության, գազի և էլեկտրաէներգիայի ոլորտներում։ Միջին իրական աշխատավարձը 300- 350 հազար դրամ է կազմում։
Մյուս ոլորտներում դրանք անհամեմատ ցածր են՝ միջինը 150 հազար դրամ: Նոր բացվող աշխատատեղերն էլ, որոնց մասին արդեն մեկ տարի է, ինչ կառավարությունն է բարձրաձայնում, պարզվում է ի վիճակի չեն կանխել արտագաղթը։ «Նորավանք» գիտակրթական հիմնադրամի փոխտնօրեն Սամվել Մանուկյանն է պարզաբանում, թե ինչու:
«Վերադարձ և պաշտպանություն» սոցիալ-իրավական ՀԿ նախագահ Տաթևիկ Բեժանյանը նկատում է՝ հիմնականում Հայաստանից հեռանում են բարձր որակավորում ունեցող մասնագետները:
Այն, որ Հայաստանում արտագաղթի պատկերը մտահոգիչ է, բարձրաձայնում են նաև իշխանությունները; Ավելին, Հայաստան- Սփյուռք 6-րդ համաժողովի ժամանակ նախագահ Սերժ Սարգսյանը կրկին առաջիկա տարիների անելիքներում խոստացավ՝ առաջնահերթ է լինելու Հայաստանում բնական աճի տեմպերի ավելացումը, արտագաղթի և ներգաղթի հարաբերակցության էապես վերափոխումը: Նշեց, որ նպատակադրել են՝ 2040 թվականին ունենալ 4 միլիոն բնակչություն:
Ներգաղթ կազմակերպելու համար նախ պետք է արտագաղթը կանխել, զարգացնել տեխնոլոգիական տնտեսությունը՝ ասում է «Նորավանք» գիտակրթական հիմնադրամի փոխտնօրեն Սամվել Մանուկյանը:
Փորձագետը կարծում է Հայաստանից հեռացածների մի մասը կվերադառնա, սակայն՝ տնտեսական 10 և ավելի տոկոս շարունակական՝ 5-7 տարի աճ ունենալու դեպքում:
Պաշտոնյաները խոստանում են մինչև յոթ տոկոս տնտեսական աճ, սակայն, տնտեսագետ փորձագետները անգամ այս թվերին են վերապահումով մոտենում: Երկնիշ տնտեսական աճի մասին պաշտոնյաներից և ոչ մեկը անգամ չի խոսում:
