Սեպտեմբերից կմեկնարկի «Հայաստանի տնկարկների կադաստրի» ստեղծման ծրագիրը: Այն` ըստ Խաղողագործության և գինեգործության հիմնադրամի գործադիր տնօրեն Զարուհի Մուրադյանի, հնարավորություն կտա գույքագրել հանրապետության խաղողի բոլոր տնկարկներն ու առկա սորտերը, վերահսկելի դարձնել գինեգործական արտադրանքի որակը: Նախաձեռնությունը դրական է գնահատում նաև Գինու ազգային կենտրոնի նախագահ Ավագ Հարությունյանը: Նա այսօր խոսել է գինեգործության զարգացման հեռանկարներից ու կարևորել արտահանման շուկաների դիվերսիֆիկացումը:
«1,5 անգամ գինու արտադրության ծավալներն են ավելացել, մոտ 7 տոկոս աճ կա կոնյակի: Օղու արտադրության ծավալները 10 տոկոսով նվազել են»:
Հայկական գինու և կոնյակի արտահանման հիմնական շուկան շարունակում է մնալ ՌԴ-ն: Այստեղ էլ ռուսական ռուբլին է աժեզրկվում, ՌԴ նկատմամբ կիրառվող պատժամիջոցները նույնպես կունենան իրենց ազդեցությունը: Ավագ Հարությունյանի փոխանցմամբ՝ պատժամիջոցների խորացումը ՌԴ-ին ստիպում են հնարավորինս արագ անցում կատարել ռուսական կոնյակի, գինու և օղու վաճառքին: Սա նախատեսվում էր 2025թ: Գործընթացն, ըստ գինեգործի, արագացել է:
Հայաստանի՝ ԵԱՏՄ անդամակցությունը գինու և կոնյակի շուկայի վրա որևէ ազդեցություն չունեցավ՝ ոչ դրական, ոչ բացասական: Հայկական կոնյակի դասական շուկաները ԱՊՀ երկրներն են, իսկ սպառման ամենամեծ ծավալները ՌԴ-ում են: Ավագ Հարությունյանը շուկաների դիվերսիֆիկացման անհրաժեշտությունն է ընդգծում: Սա նաև գյուղատնտեսության նախարարությունում են կարևորում: Հայաստանի խաղողագործության և գինեգործության հիմնադրամի գործադիր տնօրեն Զարուհի Մուրադյանը նույնպես նշում է՝ հիմնական շուկան ՌԴ-ն է:
Հայկական գինու որակը գնահատում են նաև մեր երկիր այցելող զբոսաշրջիկները՝
«Այս գինին շատ համեղ է, ես գինու մասնագետ չեմ, բայց հայկական գինի շատ համեղ է: Սա հրաշալի գինի է»:
Եվրոպացիները, ու ոչ միայն, հայկական գինին համտեսեցին ու գնահատեցին նաև Հայաստանի սահմաններից դուրս: Հայ գինեգործները հայկական գինու որակով գրավեցին Եվրոպայում հայտնի գերմանական «MUNDUS VINI 20th Grand International Wine Awards» միջազգային մրցույթի հարթակը: Մեկնեցին 19 գինեգործական ընկերություններ, վերադարձան՝ 23 մեդալով՝ 10 ոսկի և 13 արծաթ: Հայաստանի խաղողագործության և գինեգործության հիմնադրամի գործադիր տնօրեն Զարուհի Մուրադյանը վստահեցնում է՝ հաղթարշավը շարունակվելու է: Այս պահին ամենակարևորը հումքի ապահովումն է: Նախ, սակայն, պետք է պարզել, թե ինչ ունենք.
«Մեր նպատակն է ստեղծել էլեկտրոնային միասնական տեղեկատվական համակարգ, որտեղ կտեղադրվի մշտապես թարմացվող տեղեկատվություն խաղողի տնկարկների, բերքի մշակությամբ և մթերմամբ զբաղվող բոլոր շահառու կողմերի վերաբերյալ»:
Ծրագիրը կմեկնարկի սեպտեմբերից: Սռաջիկայում հայկական գինեգործական 15 ընկերություններ միասնական տաղավարով հայկական արտադրանքը կներկայացնեն Չինաստանում և Գերմանիայում:
