Անի Մինասյան
«Ռադիոլուր»
Ամռան վերջին ամիսն է, նաև հանգստի ամենաթեժ շրջանը: Ամռան տապը բոլորին ստիպում է մտածել հանգստի մասին: Ինչպես են հանգստանում հայաստանցիները, ուր են նախընտրում գնալ և ի՞նչ պայմաններ են առաջարկում զբոսաշրջային գործակալությունները:
Ամռան վերջին ամիսն է, սակայն հանգստանալու համար դեռ ուշ չէ: Ծովային հանգիստն ինչպես ամեն տարի, այս տարի ևս շարունակում է մնալ հայաստանցիների համար հանգստի ամենապահանջված տարբերակը՝ կոնկրետ ուղղություններն արդեն կախված են ֆինանսական հնարավորություններից:Եվրոպական երկրներում ծովափնյա հանգիստն ավելի թանկ է, իսկ հարևան երկրում՝ Վրաստանում գներն ավելի մատչելի են: «Դիսքավըրի Թրեվլ» տուրիստական ընկերության մենեջեր Հասմիկ Լևոնյանը թվարկում է հայաստանցիների նախընտրելի հանգստյան ուղղությունները: Դրանք մեծ մասամբ չեն փոխվել:
Որպես կանոն Հայաստանում հանգստանալու տարբերակը նախընտրությունների շարքում ամենավերջինն է: «Արմենիա Թրեվլ» տուրիստական գործակալության գլխավոր տնօրեն Հայկ Գրիգորյանը պատճառը ծովի բացակայությունն է համարում: Ասում է՝ գնային առումով միջին եկամուտ ունեցող քաղաքացին հնարավորություն ունի իր հանգիստը կազմակերպել նաև Հայաստանում.
Գները թանկ են Հայաստանում հանգիստը կազմակերպելու համար՝ հակառակն է ասում «Դիսքավըրի Թրեվլ» տուրիստական ընկերության մենեջեր Հասմիկ Լևոնյանը:
Մարդիկ չգիտեն մատչելի փաթեթների մասին, որովհետև դրանք քիչ են գովազդվում, պնդում է Գրիգորյանը: Հայաստանի քաղաքացիները շարունակում են մեկնել արտերկիր՝ նախընտրելով իրենց հանգիստը կազմակերպել Հայաստանի սահմաններից դուրս: Դրանում համոզվեցինք՝ փոքրիկ հարցում կատարելով Երևանի փողոցներում:
Հայաստանում հանգստանալ ցանակցող հայաստանցուն և արտասահմանցի զբոսածրջիկին առաջարկվում են գրեթե նույն փաթեթները:
Մեկշաբաթյա տուր-փաթեթը՝ 3 անգամյա սնունդով, օտարերկրացու համար արժի միջինը 1000 եվրո, իսկ հայաստանցու համար այդ նույն փաթեթն ընդամենը 10 տոկոսով՝ 100 եվրոյով էժան է:
Հայկ Գրիգորյանը նշում է այս թվերը, և միաժամանակ պնդում, որ որ գնային տարբերությունը զգալի է:
Աշխատանքային տարին պետք է ամփոփել գոնե երկշաբաթյա հանգստով, հորդորում է հոգեբան Քրիստինե Ավետիսյանը: Անհատն ինքն է որոշում իրեն հարմար հանգստի լավագույն տարբերակը, միայն պետք է դա կազմակերպելու ճիշտ ձևն իմանալ, ասում է հոգեբանը: Մեզանում պակասում է հանգստի մշակույթը և չհանգստանալը բարձր գներից բացի պայմանավորված է նաև այլ հանգամանքներով:
Հայաստանում, թե Հայաստանից դուրս, անհրաժեշտ է հանգստանալ՝ ավելի արդյունավետ աշխատելու համար: Տարբերակները հանգստացողն է ընտրում, ասում է հոգեբանը:
