Համապետական 2-րդ շաբաթօրյակին մասնակցում են Արմավիրի մարզի համայնքները: Մաքրվում էին ոչ միայն համայնքների ներսում կուտակված աղբը, այլև գյուղամիջյան ճամփեզրերի աղբակույտերը: Համայնքների բնակիչները կոչ են անում աղբը թափել միայն նախատեսված վայրերում։
Ծանր տեխնիկայի և բեռնատարների շարժիչների ձայները լսելի էին Արմավիրի մարզի գրեթե բոլոր համայնքներում: Համապետական 2-րդ շաբաթօրյակին մաքրվում էին փողոցները, այգիները, հուշարձաններն ու դրանց հարող տարածքները: Մաքրման աշխատանքները առավոտ վաղ էին սկսվել, հովին: Արևիկ- Տանձուտ միջհամայնքային ճանապարհի մի հատվածում, որտեղ հիմնականում ճահճուտներ են, կուտակվում է Արևիկ գյուղի աղբը: Տարածքն այսօր մաքրվում էր ու աղբը թաղվում հողի տակ:Գյուղում ամսվա մեջ մի քանի անգամ է աղբահանություն իրականացվում, Արգամը դժգոհում է այն մարդկանցից, ովքեր իրենց կենցաղային աղբը թափում են ճամփեզրերին, խոտերի մեջ, քամին էլ ցաքուցրիվ անում: Հիմա ստիպված են այրել չոր խոտերն ու մաքել աղբը: Արևիկ համայնքի ղեկավար Գառնիկ Ծատուրյանը տեղեկացմամբ՝ համայնքապետարանը սեփական միջոցներով է աղբահանություն իրականացնում:
Արմավիր գյուղում համընդհանուր շաբաթօրյակի էին դուրս եկել բոլորը: Համայնքը մեծ է, տեխնիկայով ապահովված, անհրաժեշտության դեպքում օգնության են հասնում նաև հարակից համայքների բեռնատարները: Արմավիրի գյուղապետ Ռաֆիկ Մարգարյանն ասաց, որ գյուղի կենտրոնական փողոցը, որ նաև միջպետական նշանակության ճանապարհ է, մաքրվել է տարատեսակ աղբից: «Համայնքում աղբահանությունն իրականացվում է ամեն շաբաթ-կիրակի, բեռնատարը փողոցից-փողոց հավաքում է աղբն ու թափում աղբավայրում, որի ընդհանուր մակերեսը 1500 քմ է»:
Մաքրությունը սկսվում է յուրաքանչյուրիս տնից ու բակից: Նալբանդյան գյուղում ևս աշխուժություն էր, բակային տարածքները մաքրվում էին ավազի մնացորդներից ու հողի կույտերից: Այգիների, հուշարձանների ու դպրոցների տարածքներն էլ մշտապես մաքրում են դպրոցականները: Թեպետ ամառային արձակուրդներ են, բայց նալբանդյանցի դպրոցականները չեն զլացել, պատրաստակամ եկել ու մաքրել են իրենց վստահված տարածքը: «Մեր դպրոցի ու համայնքի համար մենք պատրաստ ենք ամեն ինչ անել»,- ասաց 9-րդ դասարանցի Աիդան:
Դպրոցականներն ասում են, որ համայնքը նաև իրենց տունն է, այն պետք է մաքուր պահել, որ ամաչելու տեղ չունենան:
