Քաղաքացիական հասարակության ներկայացուցիչները մտահոգված են դատական նիստերի ընթացքում փաստաբանների գործունեությանը խոչընդոտելու, ամբաստանյալների նկատմամբ բռնություններ կիրառելու միջադեպերով : Նման միջադեպերով ուղեկցվում է հատկապես ՊՊԾ գնդի գրավման մեջ մեղադրվող խմբի անդամների դատավարությունը: Դատական նիստերն անցնում են լարված մթնոլորտում, սանկցիաներ են կիրառվում ոչ միայն ամբաստանյալների, այլ նաև փաստաբանների նկատմամբ:
«Վերջին զարգացումները ցույց են տալիս, որ պետությունը կենտրոնացել է փաստաբանների նկատմամբ համատարած ճնշումների վրա, ստեղծում է իրավիճակներ, որտեղ նախապես կարելի է գուշակել, թե իրենց ինչպես պահեն»:
Փաստաբան Հայկ Ալումյանը որպես իր գնահատականի հիմնավորում նշում է փաստաբանների անձնական իրերի զննությունը, նրանց դեմ կիրառվող սանկցիաները: Այս միջադեպերով ուղեկցվում է հատկապես ՊՊԾ գնդի գրավման մեջ մեղադրվող խմբի անդամների դատավարությունը: Դատական նիստերն անցնում են լարված մթնոլորտում, ուղեկցվում ոչ միայն ամբաստանյալների, այլ նաև նրանց պաշտպանների նկատմամաբ կիրառվող ակցիաներով: Ըստ փաստաբանների ՝ սա աննախադեպ պրակտիկա է:
«Հասել ենք այնտեղ, որ դատավորը պաշտպանին ասում է ամբաստանյալ Լուսինե Սահակյան …. Հասկանալի է, որ վրիպակ է, բայց Ֆրեյդի տեսությամբ նման վրիպակները պատահական չեն լինում»:
Փաստաբանները խոսում են նաև այն գործողությունների մասին, որոնց բախվում են մինչ դատական նիստերի դահլիճ մտնելը: Այն զննությանը, որին ենթարկվում են փաստաբանները դատական կարգադրիչների կողմից, առնվազն նվաստացուցիչ է՝ ասում է «Սասնա ծռերի» գործով մեղադրվող մի քանի անձանց պաշտպանությունն իրականացնող Մուշեղ Շուշանյանը:
«Փորձ է արվում փաստաբաններին նվաստացնել, նրանց արժանապատվությունը վիրավորել: Ասենք պահանջ է ներկայացվում դրամապանակը բացել, հակառակ դեպքում դատական կարգադրիչները զեկուցագրեր են ներկայացնում դատավորին, որոնց հիման դատավորը սանկցիաներ է կիրառում»:
Այն, ինչ փաստաբանները խուզարկություն են որակում, ընդամենը զննություն է, որի իրավունքը դատական կարգադրիչներն, ըստ Դատական օրենսգրքի, ունեն՝ այսպես է հակադարձում փաստաբանների պնդումներին Դատական դեպարտամենտի ղեկավարը: Կարեն Փոլադյանը վստահեցնում է՝ իրենց բոլոր գործողություններն արվում են միայն անվտանգության նկատառումներով:
«Որևէ դատական կարգադրիչի չի հետաքրքում, թե ինչ կա փաստաբանի դրամապանակում կամ պայուսակում: Մենք զննություն ենք իրականցնում, որի նպատակը միայն անվտանգություն ապահովելն է»:
Կարեն Փոլադյանը համաձայն չէ նաև այն դիտարկմանը, թե մինչ այժմ դատական կարգադրիչները նման հետևողականություն չեն ցուցաբերել:
«Պրակտիկան եղել է, դուք չենք նկատել, բայց գուցե չի եղել պարբերական: մենք հասնելու ենք նրան, որ բոլոր դատարաններում բոլոր անձինք, անկախ նրանից փաստաբան են թե մեղադրող, ենթարկվեն զննության»:
Ի դեպ, փաստաբաններից Մուշեղ Շուշանյանը հենց այսօր էր տեղեկացել, որ իր նկատմամբ կարգապահական վարույթ է հարուցվել: Փաստաբանների պալատն այս որոշումը կայացրել է ոստիկանապետի դիմումի հիման վրա: Վովա Գասպարյանը կարծում է, որ Շուշանյանը, մեկնաբանելով «Սասնա ծռերի» գործով դատավարության ընթացքում ոստիկանության ծառայողների գործողությունները, իրավապահների հասցեին անհարգալից արտահայտություններ է արել: Իսկ դրանք, ըստ ոստիկանության, վնասում են համակարգի նկատմամբ հանրային վստահության ամրապնդմանը: Հիմա պալատը պետք է քննի փաստաբանին վերագրվող արարքը և պարզի՝ կարգապահական խախտում կա թե ոչ:
Ես մի վարույթ պալատն արդեն դատախազության դիմումի հիման վրա հարուցել է փաստաբան Արայիկ Պապիկյանի նկատմամբ: Այս դեպքում նույնպես առիթը փաստաբանի հրապարակային հայտարարություններն են: Փոխարենը մի վարույթի հարուցումն էլ արդեն դատավորի դիմումի հիման վրա մերժվել է: Խոսքն այն միջադեպի մասին է, երբ դատական նիստի ժամանակ ամբաստանյալն իր պաշտպանին գրություն էր փոխանցել, ոստիկանները թույլ չէին տվել, իսկ դատավորը դիմել էր Փաստաբանների պալատ: Կառույցը ոչ միայն մերժել է փաստաբան Արա Ղարագյոզյանի նկատմամբ կարգապահական վարույթ հարուցելը, այլ նաև որոշել է դիմել ոստիկանության պետին հակառակ պնդումով ՝ քննել փաստաբանից թուղթն առգրաված ոստիկանի վարքագիծը:
