Հերթական հինգշաբթին կառավարությունում. վարչապետ Կարեն Կարապետյանն այսօր գերատեսչությունների ղեկավարների առջև հստակ պահանջ է դրել՝ ներկայացվող հարցերը պետք է ամբողջությամբ համապատասխանեն օրենսդրությանը, իսկ տրված հանձնարարությունները պատշաճ և սահմանված ժամկետներում կատարվեն: Մինչդեռ՝ ՀՀ կառավարության աշխատակազմի ղեկավար-նախարարը զեկուցել է, որ արձանագրվել են դեպքեր, երբ կառավարության նիստին ներկայացվող հարցերը չեն համապատասխանել օրենսդրությամբ նախատեսված պահանջներին կամ համապատասխան նախագծերը լրամշակելու համար տրամադրված ժամկետները չեն պահպանվել: Նիստի վերջում վարչապետը հրաժեշտ է տվել արդարադատության նախարար Արփինե Հովհաննիսյանին:
Ինչպես կառավարության նախորդ նիստերում՝ այս անգամ եւս վարչապետը հանձնարարություններ տվեց։ Հանձնարարությունների այս ինստիտուտն ակտիվացավ Կարեն Կարապետյանի վարչապետ նշանակվելուց հետո: Սակայն սա կառավարության ղեկավարի բերած միակ նորույթը չէ: Նշանակման առաջին իսկ օրվանից հիմնական շեշտը դրվեց ներդրումներ ներգրավելու, դրանք խթանելու ու ամենակարևորը՝ տնտեսական աճն ապահովելու վրա: 3,2 մլն դոլարի ներդրումների խոստում տվեց այս կառավարությունը: Ընդհանրապես Կարեն Կարապետյանի կառավարության անդամները ամենաշատն են խոսում ներդրումների մասին: Ֆինանսների նախարար Վարդան Արամյանը, օրինակ, կառավարության նախորդ նիստից հետո հայտարարեց՝ ամբողջական պատկերը պարզ կլինի, երբ ԱՎԾ-ն մայիսի վերջին ամփոփի տվյալները:
Այս ընթացքում կառավարությունը 95 մլրդ դրամի արտոնություններ ու մաքսատուրքերի վճարման հետաձգման հնարավորություններ է տվել տարբեր ներդրումային ծրագրերի՝ այսօր արդեն կառավարության նիստից հետո ասաց տնտեսական զարգացման և ներդրումների նախարար Սուրեն Կարայանը:
ՊԵԿ նախագահ Վարդան Հարությունյանը հայտնեց՝ նախորդ վեց ամսվա ընթացքում 290 ԱԱՀ հարկ վճարողի վերադարձվել է շուրջ 28 մլրդ դրամ: Սուրեն Կարայանը նշում է, որ ռուսաստանաբնակ գործարար Սամվել Կարապետյանի և ՀՀ վարչապետի նախաձեռնությամբ ստեղծված Ներդրողների ակումբի կողմից ներդրումային ծրագրերի իրականացումը ընթացքի մեջ է։ Ծրագրերն են ուսումնասիրվում, առաջիկայում հստակ առաջարկություններ կներկայացվեն:
«Առաջին ներդրումները կուղղվեն հիմնականում վերականգնվող էներգետիկայի ոլորտ: Բավականաչափ ծրագրեր սկսվել են, մոտ ժամանակներս Ազգային վիճակագրական ծառայությունը կհրապարակի, թե որքան օտարերկրյա ներդրումներ են եղել, որքան` տեղական»:
Հայտարարված 7 հազար աշխատատեղի փոխարեն 2017-ին ակնկալվում է ստեղծել 10 հազար աշխատատեղ: Տնտեսագետ Բագրատ Ասատրյանը «Ռադիոլուրի» հետ զրույցում նշում է, որ ներդրումային ծրագրերը գործարքներ են, դրանք կարող են լինել լավ կամ վատ:
Տնտեսագետ Վահագն Խաչատրյանն էլ «Ռադիոլուրի» հետ զրույցում հիշեցնում է՝ 2016-ի նույն այս օրերին տնտեսական ակտիվության ցուցանիշը 6 տոկոս էր կազմում, ակնկալիքները մեծ էին, սակայն չարդարացան:
Ընդհանրապես՝ արդյունք տեսնելու համար մասնագետները կարծում են, որ պետք է երկարաժամկետ ռազմավարական ծրագրեր մշակվեն։ Նշենք նաև, որ տարեսկզբին Հայաստանում ստեղծվեց Ռազմավարական նախաձեռնության կենտրոնը։ Ակնկալվում է, որ այստեղ են ստեղծվելու տնտեսության զարգացման երկարաժամկետ ռազմավարությունները:
