Լրատվամիջոցները դժվարություններից, ըստ փորձագետի, կորուստներով, բայց դուրս են գալիս և շարունակում են գործել: Ընդհանուր առմամբ՝ վերջին տարիներին Նավասարդյանը մեդիա դաշտում զարգացում ու կայացում արձանագրում է, հատկապես նկատելի համարելով նոր մեդիայի զարգացումը, բայց նշում է մի խնդիր, որից դուրս գալ, ասում է, կդժվարանար անգամ Կոպերֆիլդը: Խոսքը թվայնացման արդյունքում մարզային հեռուստաընկերությունների համար ստեղծված իրավիճակի մասին է: «Թվայնացման արդյունքում ունենք մի իրավիճակ, երբ մարզերում գործող հեռուստաընկերությունները հնարավոր է փակվեն: Այս խնդիրը բոլորը շատ լավ հասկանում են, բայց ուզում ենք հավատալ այն հայտարարություններին, թե հատուկ քաղաքականություն չի հետապնդում այս գործելաոճը: Սակայն ոչ մի բան չի արվում, որպեսզի մարզային ՀԸ-երը չփակվեն»:
Խնդիրը տևական ժամանակ բարձրացնում են նաև իրենք՝ մարզային հեռարձակող լրատվամիջոցները: «Հեռուստատեսության եւ ռադիոյի մասին» օրենքում 2010-ին կատարված փոփոխությամբ լիցենզավորման մրցույթների նոր կարգ է սահմանվել՝ նախատեսելով մեկ մասնավոր մուլտիպլեքսորի գոյություն: Ի դեպ՝ մասնավոր մուլտիպլեքսորի լիցենզավորման այս տարի անցկացված մրցույթը հայտարարվել է չկայացած՝ հայտերի բացակայության պատճառով: Որպես միջանկյալ լուծում անալոգային լիցենզիաների ժամկետը 1 տարով երկարաձգել է, բայց խնդիրը չի լուծվել:
Մարզային 6 հեռուստաընկերությունների ներկայացուցիչներ համատեղ հայտարարություն են տարածել, նրանց միացել են լրագրողական կազմակերպությունները: Նրանք կոնկրետ լուծումներ են առաջարկում և իշխանություններին հորդորում գտնել դրանցից ամենաարդյունավետը:
Երևանի մամուլի ակումբի նախագահի խոսքով՝ խնդիրը հատկապես սուր է գարնանը սպասվող ընտրություններից առաջ: «ՀՀ պատմության մեջ առաջին անգամ ունենալու ենք տարածքային ցուցակներով ընտրություն, ինչի լուսաբանման հիմնական բեռը կրելու են մարզային ԶԼՄ-ները»:
Ի դեպ , սա թվայնացման այն դրսևորումներից մեկն է, երբ հնարավորությունները արդյունքում ոչ թե ավելանում , այլ՝ պակասում են: Երևանի մամուլի ակումբի նախագահը հիշեցնում է, որ առաջիկա ընտրություններից թե իշխանությունների, թե հանրության , թե միջազգային կառույցների ակնկալիքները մեծ են: Բայց դեռ ընտրությունները չսկսած 2 հարց արդեն մտահոգության տեղիք է տալիս: Մեկը մարզային ԶԼՄ-ների նկատմամբ ոչ մրցակցային պայմանների առկայությունն է, մյուսը՝ Ընտրական օրենսգրքում լրագրողների և լրատվամիջոցների իրավունքների սահմանափակումը»:
Ընտրական օրենսգրքում, հիշեցնեմ, վերանայվել են նաև լրագրողներին ու լրատվամիջոցներին վերաբերող դրույթները: Մասնագիտական շրջանակները հատկապես մտավախություն ունեն դրույթներից մեկի վերաբերյալ, որը պատասխանատվություն է սահմանում կրկնակի քվեարկության մասին կեղծ հաղորդում ներկայացնելու համար: Սա, նրանց կարծիքով, զսպաշապիկի դեր է ունենալու ընտրությունների ընթացքը վերահսկողների համար: Շատ բան, իհարկե կախված կլինի հանգամանքից, թե ինչպես կկիրառվի այդ դրույթը: Փորձագետներն ասում են՝ չգիտեն, թե իրավապահ մարմինները որքանով կօգտվեն այս գործիքից , բայց որ գործիքը նրանց ձեռքում է և կարող է օգտագործվել, չեն կասկածում:
