Ազգային ժողովն այսօր ավարտել է արտահերթ նստաշրջանի աշխատանքը: Քվեարկվել են արտահերթի 4 օրերի ընթացքում քննարկված մի քանի տասնյակ օրինագծերը: Այդ թվում՝ Ազգային ժողովի կանոնակարգը, Մարդու իրավունքների պաշտպանի, կուսակցությունների ու հասարակական կազմակերպությունների մասին օրենքները: Ի դեպ, հարցերից երեքը վարչապետի առաջարկով արտահերթ նստաշրջանի օրակարգից հանվել է:
ԱԺ արտահերթ նստաշրջանի վերջին օրը քվեարկություններն այնքան շատ էին, որ ԱԺ նախագահից դրանց անվանումների ընթերցելն ու քվեարկություն կազմակերպելը կես ժամից ավելի պահանջեց: Ավելին, արտահերթի օրակարգն այնքան հագեցած էր, որ օրենքներից մի քանիսի բովանդակությունը պատգամավորները ճշտում էին քվեարկությունից առաջ:
«Օրենքների էս արագ քննարկումների արդյունքում երբեմն չենք հասցնում տեղեկանալ ամբողջական ինֆորմացիային»,- ասում էր Արամ Մանուկյանը։ Նրա այս դիտարկումը վերաբերում էր « Գնումների մասին» օրենքին, ավելի ստույգ՝ դրա այն հոդվածին, որը վերաբերում է հանրապետության նախագահի, ԱԺ նախագահի ու վարչապետի ծախսերին: Որ օրենքում նման հոդված կա, պատգամավորը տեղեկացել էր մամուլից: «Մամուլում տեղեկություններ եղան, որ այս օրենքով նախատեսվում է, որ ԱԺ նախագահի, նախագահի ու վարչապետի պետական ծախսերը դառնում են պետական գաղտնիք ու թափանցիկ չեն լինելու»:
ԱԺ նախագահ Գալուստ Սահակյանն էլ էր մամուլից իմացել, որ իր, հանրապետության նախագահի ու վարչապետի ծախսերն այսուհետ «Պետական գնումների մասին» օրենքի համաձայն գաղտնի են լինելու: Իր մասով վստահեցրեց, որ գաղտնի չեն լինի: «Ես էլ եմ այդ մասին թերթից տեղեկացել, ու դժվար թե նման բան լինի»,- ասաց։
Տնտեսական հարցերի հանձնաժողովի նախագահ Վարդան Այվազյանը նախ մի նկատառում արեց: «Եթե մամուլին հավատում եք՝ հավատացեք նաև օրենքներին»: Հետո պարզաբանեց՝ միայն գնման արարողակարգն ու ծախսերի մրցույթներն են փակ լինելու: «Խոսքը վերաբերում է արարողակարգի գնումներին, որն իրականցվում է փակ կարգով, զուտ արարողակարգի, որ ռեստորանում որտեղ հաց ուտեն։ Այդ երեք մարմիններինը փակ պետք լինի»:
Նախագիծն ընդունվեց ձայների 77 կողմ, 22 ձեռնպահ, 2 դեմ հարաբերակցությամբ:
Խորհրդարանն այսօր ավարտեց արտահերթ նստաշրջանի աշխատանքը: Դրա ընթացքում, հիշեցնեմ, մի քանի տասնյակ օրենքներ ընդունվեցին: Այդ թվում՝ հարկային համաներման մասին փաթեթը, որը մի շարք արտոնություններ է նախատեսում փոքր ու միջին ձեռնարկատիրությամբ զբաղվողների համար, ապօրին հարստացման քրեականացում նախատեսող փաթեթը, որը քրեական պատասխանատվություն է նախատեսում այն պաշտոնյաների համար, որոնց հայտարարագրերում իրավապահները գույքի ու օրինական եկամուտների էական անհամապատասխանություն կգտնեն:
Այս արտահերթի ընթացքում երրորդ ընթերցմամբ և ամբողջությամբ ընդունվեց նաև զինծառայողների կյանքին կամ առողջությանը պատճառված վնասների հատուցման մասին օրենսդրական փաթեթը: Այն «1000 դրամներ» պայմանական անվանումն է ր ստացել: Չնայած հակասական գնահատականներին՝ 2017-ից նոր հիմնադրամը, որը կձևավորվի յուրաքանչյուր աշխատողի վճարած 1000 դրամից, կսկսի գործել: Պաշտպանության նախարարը, հիշեցնեմ, ասել է, որ հիմնադրամին թափանցիկ արդյունավետ աշխատանքն իր պատվի հարցն է:
