Թուրքիայի մարդու իրավունքների ասոցիացիան (IHD) բողոք է ներկայացրել Ստամբուլի դատախազություն՝ Թուրքիայի փոխվարչապետ Նուման Կուրտուլմուսին մեղադրելով Մարդու իրավունքների համընդհանուր հռչակագրի խախտման մեջ՝ հայտնում է AFP-ն:
Նշենք, որ բարձրաստիճան թուրք պաշտոնյայի կողմից օգտագործած <<գավուր>> բառով Օսմանյան կայսրությունում նկարագրում էին մարդու ոչ մահմեդական լինելու հանգամանքը։
Այս ամսվա սկզբին Թուրքիայի փոխվարչապետ Նուման Կուրտուլմուսն իր ելույթի ժամանակ օգտագործել է gavur (անհավատ) բառը, ինչը դուր չի եկել Թուրքիայում բնակվող հայերին:
Փոխվարչապետը թուրքական Կոստամոնու քաղաքում հանդիպման ժամանակ իր ելույթում նշել է, որ իրենք անկախության հանգամանքը պետք է լուրջ ընդունեն, որովհետև իրենց համար անկախությունը դա բարձր դիրքերում լինելն է և <<անհավատներին>> անհավատ կոչելը:
Թուրքիայի խորհրդարանի հայազգի պատգամավոր Կարո Փայլանն իր խոսքում նշել է, որ փոխվարչապետի մեկնաբանությունները ատելության խոսքեր էին, ինչի համար նա պետք է ներողություն խնդրի: <<Ես պատգամավոր եմ, ում մանկության տարիներին քարկոծել և անհավատ են անվանել>>,- նշել է Փայլանը:
Նշենք նաև, որ հետագայում փոխվարչապետը պարզաբանել է իր մեկնաբանությունը՝ նշելով, որ ինքը նպատակ չի ունեցել վիրավորել իրենց ոչ մահմեդական համաքաղաքացիներին:
