ԿարևորՔաղաքական

Մարզպետերը՝ կրճատումների ու իրենց պաշտոնանկությունների մասին

lusinevasilyan

Օրվա երկրորդ կեսին խորհրդարանում քննարկել են հաջորդ տարվա բյուջեից տարածքային կառավարման մարմիններին, համայնքներին ուղղվելիք հատկացումները: Ընդհանուր առմամբ՝ ոլորտին նախատեսվում է տրամադրել այնքան գումար, որքան նախորդ տարվա ընթացքում: Քննարկմանը մասնակցող մարզպետներին ուղղված լրագրողների հարցերը սակայն հիմնականում վերաբերել են ոչ թե հատկացումներին, այլ՝ հնարավոր կրճատումներին: Օպտիմալացման հանձնարարական ունեն նաև  մարզպետարանները, իսկ մի քանի մարզպետների հնարավոր փոփոխությունների մասին տեղեկությունները շրջանառվում են արդեն տնական ժամանակ:

 

Բյուջե 2017-ի նախագիծն ընդհանուր առմամբ 48 մլրդ դրամ դոտացիան հատկացումներ է նախատեսում համայնքներին:  Դրա ավելի քան մեկ քառորդը՝ 13 մլրդ դրամ կուղղվի Երևանին, մնացած մասը՝ 10 մարզերին: Բյուջեից ամենաշատ հատկացումներ կստանա Արարատի մարզը՝ մոտ 4.5 մլրդ, ամենաքիչը Վայոց ձորի մարզը ՝ հազիվ 1 մլրդ՝ 988 մլն: Նկատենք, որ դոտացիաները մարզերին տրվում են ըստ օրենքով նախատեսված սահմանումների ՝ դրանք չեն կարող պակաս լինել մարզի համախառն ներքին արդյունքի 4 տոկոսից:

Մարզերը նաև այլ հատկացումներ են ստանում տարբեր ծրագրեր իրականացնելու համար: 2017 թվականի պետական բյուջեով, օրինակ, Արարատի մարզին  նախատեսված է հատկացնել  մոտավորապես 7 միլիարդ 659 միլիոն դրամ: Մարզպետ Ռուբիկ Աբրահամյանի պարզաբանմամբ՝ նախորդ տարվա համեմատությամբ՝ 2 միլիոն դրամով պակաս:

Բյուջետային քննարկմանը մասնակցող մարզպետերին ուղղված  լրագրողների հարցերը սակայն հիմնականում վերաբերում են ոչ թե հատկացումներին, այլ հնարավոր կրճատումներին: Օպտիմալացման հանձնարարական ունեն նաև  մարզպետարանները.  մի քանի մարզպետերի հնարավոր փոփոխությունների մասին տեղեկություններն արդեն շրջանառվում են  տնական ժամանակ:

Անդրադառնալով փոխմարզպետերի հնարավոր կրճատմանը՝  Արարատի մարզպետն  ասաց, որ քննարկման արդյունքում  կհասկանան յուրաքանչյուրի արդյունավետությունը և որոշում կկայացնեն։ Մինչ այժմ կրճատումներ, ասաց , չեն եղել, իսկ իր պաշտոնանկության մասին հարցին այսպես արձագանքեց. «Դուք ավելի լավ կիմանաք, ես հիմա այդ հարցին ո՞նց պատասխանեմ: Նման բան ես չեմ կարծում»:

Արագածոտնի մարզպետարանում ևս կրճատումների հանձնարարականը քննարկվում է: Մարզպետ  Գաբրիել Գյոզալյանը ասում է՝ մինչև նոյեմբերի 20-ը կներկայացնեն իրենց առաջարկները:

ՀՀ տարածքային կառավարման և զարգացման նախարար Դավիթ Լոքյանը կարծում է, որ տրամաբանական է , երբ կառավարման համակարգի օպտիմալացման համատեքստում  քննարկում է նաև  փոխմարզպետերի օպտիմալացման հարցը: Բայց նաև հիշեցնում է, թե ինչու է առաջնային դարձել այս հարցը։ «Քաղաքական փոփոխությունների արդյունքում ձևավորված կոալիցիաներում տարբեր կուսակցություններից համալրում է եղել մարզպետարաններ՝ փոխմարզպետի պաշտոնով, կոալիցիաներից դուրս գալուց հետո մարդիկ շարունակել են աշխատել, և թիվը մեծացել է: Այս խնդիրը միշտ քննարկվել է»:

Հաջորդ հարցը նախարարին ուղղվեց որպես Դաշնակցության ներկայացուցիչ: Ընտրություններից հետո   տեղեկություններ էին շրջանառվում, որ   օրակարգում Շիրակի մարզպետի փոփոխության հարցն է: Դրանք պարզապես հայտարարություններ էին ընտրություններից հետո՝ ասում է Դավիթ Լոքյանը: «Ես կարծում եմ, որ մարզպետը պետք է փոխվի մարզում տեղի ունեցած փոփոխությունների արդյունքում: Եթե նա ընտրություններին ակտիվ մասնակցություն չի ունեցել… մենք բոլորս ուզում ենք, որ մարզպետները չմասնակցեն ընտրական գործընթացին։  Շիրակի մարզպետն այդ գործառույթը պահպանել է, Շիրակի մարզպետի փոփոխության խնդիր չկա»:

Մարզպետերից թերևս միակը, որ մտավախություն չունի հնարավոր պաշտոնանկության մասին, քանի որ հազիվ մեկ ամիս  առաջ է նշանակվել այս պաշտոնում,  Սյունիքի մարզպետ Վահե Հակոբյանն է: Նա այսօր  ԱԺ-ում լրագրողների փոխանցեց, որ մարզում բարոյահոգեբանական մթնոլորտը գերազանց է, իսկ  կադրային փոփոխություն գրեթե չեն եղել:

Back to top button