Ազգային ժողովի հերթական քառօրյան առանձնապես բուռն ու հագեցած չէր , դրան ճեպազրույցների ժամանակ խորհրդարանական ուժերը այսօր չեն էլ անդրադարձել: Փոխարենը խոսել են քաղաքական հարցերի ու դրանցից վերջին օրերին ամենաշատ քննարկվող հարցի մասին: Կվերադառնա՞ արդյոք ԲՀԿ առաջնորդ Գագիկ Ծառուկյանը ակտիվ քաղաքականություն, թե՞ ոչ, սպասո՞ւմ են արդյոք այդ վերադարձին մյուս ուժերը կամ տեսնո՞ւմ են արդյոք դրա անհրաժեշտությունը, թե՞ ոչ:
ԲՀԿ առաջնորդ Գագիկ Ծառուկյանն օրերս ասել էր, թե չի բացառում, որ բացի փակված գրքի «ծալված էջն » ու ակտիվ քաղաքականություն վերադառնա: ՀՅԴ խմբակցության ղեկավար Արմեն Ռուստամյանը ոչ թե չի բացառում այդ հնարավորությունը, այլ՝ շատ հավանական է համարում և համարյա ողջունում է: «Հայաստանում այնքան ծալված էջեր են բացվել, ծալվել, որ զարմանալու բան չկա, եթե Ծառուկյանը նորից իր քաղաքական էջը բացի: Հարվարդ պետք չէ ավարտել՝ հասկանալու համար, որ եթե դու չես զբաղվում քաղաքականությամբ, քաղաքականությունն է զբաղվում քեզնով»:
Ռուստամյանը համոզված է, որ առաջիկայում քաղաքական դաշտն աննախադեպ ակտիվանալու է ու մի կողմ քաշվելը սխալ մոտեցում է լինելու: Այս ֆոնին Ծառուկյանի վերադառնալու մտադրությունը ՀՅԴ-ն առավել քան հասկանալի է համարում: Բացի այդ ՝ Դաշնակցությունը ԲՀԿ-ի հետ քառյակի շրջանակներում համագործակցել է ու դա համագործակցության վատ փորձ չի համարում: «Գագիկ Ծառուկյանի հետ աշխատել ենք, որևէ խնդիր չենք տեսնում, դրական ենք համարում մոտեցումը, որ նա այն ժամանակ չգնաց արյունահեղության»:
Համագործակցության նույն փորձին նույն գնահատականը չի տալիս Հայ ազգային կոնգրեսը: Լևոն Զուրաբյանը հիշեցնում է, որ թեև հայտարարություն են տարածել, որ բաց են համագործակցության համար, բայց միևնույնն է՝ քառյակի շրջանակներում ԲՀԿ-ի հետ համագործակցության փորձը, թերևս դրա ավարտը վատ նախադեպ են համարում: Թե հնարավո՞ր է արդյոք ԲՀԿ-ի հետ նոր համագործակցություն առաջիկայում, Զուրաբյանը դեռ չգիտի: «Չեմ ցանկանում շահարկումներով զբաղվել չկայացած փաստերի վրա: Կհասկանանք՝ ինչ քաղաքական ուժեր են մտել պայքարի մեջ, կձևավորվեն դաշինքներ, այդ ժամանակ դիմեք, կվերլուծեմ»:
Գագիկ Ծառուկյանը նաև ասել էր՝ կվերադառնա, երբ տեսնի, որ կարկառուն գործիչները չեն կարողանում արդյունքի հասնել : Զուրաբյանն այս մասով փորձում է փարատել Ծառուկյանի մտահոգությունը: «Եթե մտահոգությունը դա է, մենք այդ գործով կզբաղվենք: Մեր ուժերի վրա վստահ ենք»:
Մհեր Շահգելդյանն էլ ասում է ՝ զբաղվում ենք այնքան, որքան մեր ու քաղաքական հնարավորություններն են թույլ տալիս: ՕԵԿ-ը մտավախություն չունի, թե Ծառուկյանի վերադարձով ձայներ ու ընտրազանգված կկորցնի: «Մեր ձայները դա մեր ձայներն են, պայմանավորված են մեր աշխատանքով: Այդպիսի մտավախություն մենք չունենք: Ընտրական գործընթացը մրցակցություն է, բնականաբար, կուսակցությունները մրցակցելու են: Բայց մտավախություն, որ որեւիցե մեկը կգա ու կխլի մեր ձայները, մենք չունենք»:
Որ Ծառուկյանի վերադարձն անուղղակիորեն հարվածելու է ընդդիմադիր դաշտին, համոզված է «Ժառանգությունից» Զարուհի Փոստանջյանը: Նա այսօր հայտարարեց, որ ընտրություններից առաջ քաղաքական դաշտի ընդդիմադիր հատվածը, ընդդիմադիր ընտրազանգվածին վերահսկելու կարիք կա ու հենց դրանով պայմանավորված էլ Ծառուկյանի վերադարձի կարիքը իշխանություններն ունեն: Իսկ կա՞ արդյոք դրա կարիքը քաղաքական դաշտում: «Միգուցե իր համակիրների համար կա, բայց ես իր համակիրը չեմ ու չեմ կարծում, որ դաշտում այդ անհրաժեշտությունը կա»:
Կա այդ կարիքը, թե՝ ոչ, Հանրապետական խմբակցության ղեկավարի կարծիքով, պետք է որոշի ժողովուրդը: Վահրամ Բաղդարսյանը համաձայն չէ Ծառուկյանի այն նկատառմանը, թե քաղաքական գործիչները լավ չեն աշխատում ու գուցե հենց այդ պատճառով ստիպված լինի վերադառնալ ակտիվ քաղաքականություն:
Իսկ պնդումները, թե մեծ քաղաքականություն վերադառնալու Ծառուկյանի հայտարարությունը համաձայնեցվել է իշխանությունների հետ՝ Վահրամ Բաղդասարյանը հերքում է: «Որեւէ հանդիպում, քննարկում ոչ միայն ՀՀԿ-ականների հետ, առավել եւս՝ ՀՀ նախագահի հետ, չի եղել: Դա զուտ լրատվական հետաքրքրություն է»: Իսկ ընդհանրապես Բաղդասարյանը կարծում է, որ «եթե քաղաքականություն պետք է գան թույլտվությամբ՝ ավելի լավ է չգան»:
Լրագրողները Վահրամ Բաղդասարյանին հիշեցրին, որ ժամանակին հանրապետական գործիչները Ծառուկյանին նկատի ունենալով ասում էին, որ
քաղաքականությունը բազկամարտ չէ և որ Ծառուկյանը պետք է հեռանա դաշտից:
Ի պատասխան հիշեցմանը՝ Բաղդասարյանը նկատեց՝ մեր մոտեցումներում ոչինչ չի փոխվել:
