Քաղաքական

Մենք հավատարիմ ենք մնում հակամարտության կարգավորման ընդհանուր ջանքերին.Ուորլիք

ԵԱՀԿ Մինսկի խումբը կշարունակի աշխատել ԼՂ հակամարտության կարգավորման ուղղությամբ։ Այս մասին Բաքվում մամուլի ասուլիսի ժամանակ հայտարարել է ԵԱՀԿ ՄԽ ամերիկացի համանախագահ Ջեյմս Ուորլիքը։

«Մեր քննարկումների նպատակն է հակամարտության կարգավորման ուղի գտնելը»,-ասել է Ուորլիքը։

Նրա խոսքով՝ ԱՄՆ-ը, Ռուսաստանն ու Ֆրանսիան միասին աշխատում են հակամարտության խաղաղ լուծման հասնելու համար։

«Վերջերս բոլորս Մոսկվայում էինք և քննարկել ենք այդ հարցը Ռուսաստանի արտգործնախարար Սերգեյ Լավրով հետ։ Մենք հավատարիմ ենք մնում հակամարտության կարգավորման ընդհանուր ջանքերին»,-ասել է Ուորլիքը։

RIA Novosti-նԻ փոխանցմամբ՝ ԵԱՀԿ ՄԽ ամերիկացի համանախագահ Ջեյմս Ուորլիքը  հայտարարել է, որ ստատուս-քվոն կայուն չէ։

«Մենք պետք է շարունակենք արդյունավետ աշխատել՝ գտնելու խաղաղ կարգավորման ուղիներ»,-ասել է Ուորլիքը։

Նա նշել է, որ այսօր բանակցային սեղանին կան կարգավորման շատ տարրեր։

Ուորլիքի խոսքով՝ դեռևս չկա տեղեկություն Հայաստանի և Ադրբեջանի նախագահների առաջիկա հանդիպման մասին։

Համանախագահը հույս է հայտնել, որ երկու երկրների արտգործնախարարները կարող են հանդիպել Համբուրգում կայանալիք ԵԱՀԿ արտգործնախարարների խորհրդի հերթական հանդիպմանը։

Ուորլիքը նաև նշել է, որ տարածաշրջանում խաղաղության ժամանակն արդեն եկել է։ «Երկու երկրների երեխաները պետք է խաղաղ ապրեն և դրան անհրաժեշտ է հասնել բանակցություններով»,-հավելել է նա։ Ուորլիքի խոսքով՝ Ադրբեջանի նախագահ Իլհամ Ալիևը Հայաստանի նախագահ Սերժ Սարգսյանի հետ հանդիպման պատրաստակամություն է հայտնել ղարաբաղյան կարգավորման գործընթացի շրջանակում։

Back to top button