Խորհրդարանն արտահերթ նիստում հավանության է արժանացրել Կարեն Կարապետյանի կառավարության ծրագիրը: Փաստաթղթին կողմ է քվեարկել 85 պատգամավոր, դեմ` 7-ը, ձեռնպահ՝ 6-ը: ՀՀԿ-ն ու ՀՅԴ-ն պաշտպանել են ծրագիրը, ՀԱԿ-ը դեմ է քվեարկել, ՕԵԿ-ը՝ ձեռնպահ: ԲՀԿ խմբակցության կուսակցական պատգամավորները չեն մասնակցել քվեարկությանը: Մինչ քվեարկությունը երկօրյա քննարկումն ամփոփիչ ելույթով եզրափակել է վարչապետը: Մոտ 30 հարց ու այդքան էլ ելույթ լսելուց հետո Կարեն Կարապետյանը արձանագրել է, որ խորհրդարանում հնչած առաջարկների մի մասը հետաքրքիր էր, մյուս մասը ՝ տրամաբանորեն անհասկանալի: Անկախ հանգամանքից, թե ով ինչպես է քվեարկել, կառավարությունը բաց է համագործակցության համար ՝ հավաստիացրել է վարչապետը:
Կարեն Կարապետյանի կառավարության ծրագիրն ավելի որակյալ է, բայց և նման է նախորդներին: ՕԵԿ-ը և դրականն է տեսնում, և բացասականը, բայց միևնույնն է՝ չի կարողանում անկեղծորեն հավատալ ծրագրին: «Մենք չեն կարող կողմն լինել այն ծրագրին, որտեղ օֆշորի, ձերբակալությունների պատասխանատվության մասին ոչինչ չկա, բայց չենք էլ կարող հնարավորություն չտալ այս կառավարությանը: Դրա համար մենք ձեռնպահ կքվեարկենք»,- ասաց խմբակցության նախագահ Հերմինե Նաղդալյանը։
ԲՀԿ-ն նույնպես և հավատում է, և չի հավատում: Ամփոփիչ ելույթում Միքայել Մելքումյանը խոսեց ռազմական արդյունաբերությունից, գազի սակագնից, լոգիստիկ համակարգից, վարկերի տոկոսադրույքներից, աշխատավարձերից և եզրակացրեց. «Պետք է կոմպլեքս լուծումներ գտնել, որ թունելի վերջում լույս երևա: ԲՀԿ-ն չի կարող կիսել այս ծրագրի քաղաքական պատասխանատվությունը»:
Փոխարենը՝ քաղաքական պատասխանատվությունը կիսում է ՀՅԴ-ն: Խմբակցության քարտուղար Աղվան Վարդանյանը հորդորում է պաշտպանել ծրագիրն ու օգնել, որ այն իրականություն դառնա: ՀՅԴ-ն հավատում է, որ նախկինների գործունեությունից կամ անգործունեությունից 14-րդ կառավարությունը դասեր կքաղի ու հաջողություն կունենա։ «Եթե մասնակից ու պատասխանատու լինենք: Իմ կուսկացությունը մասնակից է ու պատասխանատու»,- ասած ՀՅԴ խմբակցության քարտուղարը։
ՀԱԿ –ը դժգոհ է կառավարության ծրագրից: Լևոն Զուրաբյանը կարծում է, որ այն հստակ չի նշում, թե որն է տեսլականը և չի տալիս գնահատական, թե որն է ներկա վիճակը, ընդամենը գործիքակազմ է ներկայացնում՝ առանց թիրախային ցուցանիշների: Ուրեմն, այլ բան չի մնում մտածել, քան այն, «որ ձեր առաքելությունը Հանրապետական կուսակցության դեմքը ընտրություններից առաջ փրկելն է»:
Այս արձանագրումից հետո ԱԺ փոխնախագահ Էդուարդ Շարմազանովին թվաց, թե Զուրաբյանը ծրագիրը կամ չի կարդացել, կամ լավ չի կարդացել: Ինչ վերաբերում է դեմքը փրկելուն, ապա ՀՀԿ-ն, Շարմազանովի խոսքով, փրկիչների կարիք չունի: «Եթե ինչ-որ մեկն էլ փրկության կարիք ունի, ուրեմն իշխանության մեջ չէ»:
ՀՀԿ խմբակցության ղեկավարի կարծիքով՝ վարչապետի մուտքը հաղթական էր ու դա պայմանավորված է նաև ծրագրով: Այն կարճ է, կոնկրետ ու հստակ լուծումներով: Վահրամ Բաղդասարյանը նկատել է, որ ելույթների մեծ մասում պատգամավորները շատ բան ծրագրից ողջունել են, հիմա չի հասկանում, թե ինչին են դեմ: «Ինչին եք դեմ: Ես կարող եմ ենթադրել, որ այն ուժերը, որոնք կողմ չեն ծրագրին, ցանկանում են ձախողել ծրագիրը այլ մանր- մունր նպատակներ իրագործելու համար»:
Եզրափակիչ ելույթը վարչապետինն էր: Մոտ 30 հարց ու այդքան էլ ելույթ լսելուց հետո Կարեն Կարապետյանը արձանագրեց, որ ելույթների մի մասը հետաքրքիր էր, մի մասի տրամաբանությունն անհասկանալի էր իրեն: Վարչապետն արձագանքեց համարյա բոլոր խմբակցություններին: «Մեր ՕԵԿ -ի գործընկերներն ասում են՝ գրել եք կոռուպցիայի դեմ պայքար, բոլորը գրել են, չգրե՞նք։ ՀԱԿ-ի գործընկերներն ասում են՝ ախտորոշում չեք կատարել: Ճիշտ եք, չենք արել, գրել ենք, որ պետք է անենք, ու այն, ինչ պետք է անենք, 20 օրը բավարար չէ»։
Վարչապետը ցանկանում էր անդրադառնալ նաև «Բարգավաճ Հայաստան» խմբակցության դիրքորոշմանը: Անունը շփոթեց: «Բարգավաճ Հանրապետականը…. Ասում է՝ ծրագիրը լավն է, բայց չկա պատրաստակամություն ծրագրին տեր կանգնելու։ Այդ պատրաստակամությունը ծրագրում ինչպե՞ս պետք է ձևակերպեինք, հուշեք՝ ձևակերպենք»։
Իսկ ընդհանրապես անկախ հանգամանքից, թե ով կողմ քվեարկեց, ով դեմ, ով չքվեարկեց՝ գործադիրը բաց է համագործակցության ու կոնկրետ առաջարկների համար:
Իսկ քվեարկությունը ցույց տվեց, որ Կարեն Կարապետյանի թիմին վստահում է 85 պատգամավոր: Սա ավելին է, քան՝ նախորդ երեք ծրագրերի խորհրդարանական աջակցությունը: Տիգրան Սարգսյանի կառավարության երկու ծրագրերը այս խորհրդարանում պաշտպանել է մոտ 70 , իսկ Հովիկ Աբրահամյանինը՝ 67 պատգամավոր:
