ԿարևորՔաղաքական

ՀԱՊԿ երեւանյան գագաթաժողովը եւ ԱԺ պատգամավորների հակասական գնահատականը

lusinevasilyan

Քաղաքական ու վերլուծական շրջանակները շարունակում են քննարկել նախորդ շաբաթվա գլխավոր իրադարձության՝  ՀԱՊԿ Հավաքական անվտանգության խորհրդի երևանյան  նստաշրջանի արդյունքները: Գնահատականները միանշանակ չեն:  Կա տեսակետ, որ համաժողովը շրջանցեց մի քանի կարևոր հարցեր, մասնավորապես կազմակերպության անդամ երկրների ղեկավարները չկարողացան  համաձայնության գալ գլխավոր քարտուղարի թեկնածության, նաև ղարաբաղյան հակամարտության  շուրջ համատեղ հայտարարության հարցերում: Կա նաև տեսակետ, որ երևանյան նիստի օրակարգում ռազմավարական նշանակության հարցեր էին: Ինչպես են ամփոփում  երևանյան նիստի արդյունքները խորհրդարանում և որ   որոշումներն են կարևորում։

 

ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը համաձայն չէ այն տեսակետին , թե ՀԱՊԿ երևանյան գագաթաժողովն  ավելի շատ հիասթափությունների, քան սպասելիքների արդարացման համաժողով էր: Կարծում է, որ այդ հիասթափություններն ընդգծելու հարցում  լուրջ դերակատարում ստանձնեցին հատկապես ռուսական լրատվամիջոցները, որոնք քննարկման հատուկ թեմա դարձրեցին  թե գագաթաժողովի՝  Երևանում անցկացման հանգամանքը, թե այն , որ մի շարք հարցերում կազմակերպության անդամ երկրների ղեկավարները չկարողացան  պայմանավորվածություններ ձեռք բերել: «Մի կողմից՝ ՀԱՊԿ անդամ երկրների ղեկավարները փորձում են ամեն կերպ բարձրացնել կառույցի հեղինակությունը, մյուս կողմից էլ, տարօրինակ, բայց այդ երկրների մամուլը նույն ինտենսիվությամբ և ջանքերով փորձում է ստվերել կառույցի հեղինակությունը»:

Արտակ Զաքարյանը կարծում է, որ երևանյան համաժողովի ընթացքում քննարկվեցին այն բոլոր հիմնական հարցերը, որոնք պետք է քննարկվեին: Իսկ այն, որ կազմակերպության անդամ երկրների ղեկավարներին չհաջողվեց համաձայնության գալ  ՀԱՊԿ նոր գլխավոր քարտուղար թեկնածության կամ Լեռնային Ղարաբաղի շուրջ համատեղ հայտարարություն հրապարակելու  հարցերում, ըստ պատգամավորի արտառոց չէ: «Միջազգային հարաբերությունների պրակտիկայում բազմաթիվ են այն դեպքերը, երբ որոշ հարցեր տեղափոխվում են  կամ դրանց քննարկումը հետաձգվում է: Սա այս դեպքերից մեկն էր»:

Ընդհանուր առմամբ՝ Զաքարյանը կարծում է, որ երևանյան գագաթաժողովի ընթացքում  քննարկված խնդիրներն ու օրակարգը ռազմավարական նշանակության էին:

ՀԱՊԿ Հավաքական անվտանգության խորհուրդը Երեւանում ընդունեց կազմակերպության գործունեության մինչեւ 2025 թվականի ռազմավարությունը, որն  ամրագրում է առաջիկա տասնամյակի համար կազմակերպության առաջնահերթությունները : Ի դեպ այս փաստաթուղթը բավական երկար է քննարկվել և հենց Երևանում հաջողվեց այն ստորագրել: Խաչատուր Քոքոբելյանին սակայն մտահոգում է այն առաջարկը, որ հնչել է ռուսական դիվանագիտական շրջանակներից: ՌԴ ԱԳ նախարարության հատուկ հանձնարարություններով դեսպանը հայտարարել է, որ ռուսական կողմը ռազմավարական  փաստաթղթում ուզում է ընդգրկել արևելյան Եվրոպայի երկրներում ՆԱՏՕ-ի հակահրթիռային անվտանգության համակարգերը սպառնալիք համարելու կետը: «Սա կնշանակի, որ ՀԱՊԿ-ը թիրախավորում է ՆԱՏՕ-ի, ԱՄՆ հակահրթիռային անվտանգության համակարգերը: Սա կնշանակի, որ հակադրության մեջ են մտնում ՀՀ, ՆԱՏՕ, ԱՄՆ շահերը, իսկ դա այդպես չէ»:

Քոքոբելյանի համար մտահոգիչ մյուս կետը վերաբերում է Ղարաբաղյան հակամարտությանը. կազմակերպության անդամ երկրներն այս անգամ էլ ձեռնպահ մնացին ընդհանուր հայտարարություն   հրապարակելուց: ԱԺ արտաքին հարաբերությունների հարցերի մշտական հանձնաժողովի նախագահն ի պատասխան բոլոր մտահոգությունների հիշեցնում է՝ Հայաստանն իր անվտանգության համակարգն ու դրա զարգացման հեռանկարները  կապում է  ՀԱՊԿ շրջանակների, Ռուսաստանի հետ ռազմաքաղաքական հարաբերությունների խորացման հետ: «Ամեն կերպ շարունակելու ենք այն քաղաքականությունը, որը մեզ հնարավորություն է տալիս հավասարակշռել բոլոր շահերը ՝ առանց դրանք հակադրելու»:

Կա՞ արդյոք անհրաժեշտություն վերապահումներ առաջ քաշելու ռազմավարական ծրագրի վերաբերյալ. հարցը Արտակ Զաքարյանի կարծիքով այս պահին ժամանակավրեպ է քննարկելը: Իսկ տեսականորեն   ոչ մի փաստաթուղթ կարծրացած չէ ու խմբագրելու հնարավորություն ունի:

Back to top button