Հասարակություն

Կյանքը՝ առանց հոր, նկարներում՝ միշտ միասին

arminegevorgyan

Ապրիլյան պատերազմում զոհված զինծառայող ավագ ենթասպա Դավիթ Գասպարյանի դուստրը` 10 -ամյա Յուլիանան  ինձ ցույց է տալիս նկարչական ալբոմը ու պատմում՝ նկարել է իրենց ընտանիքը։ Նկարում հայրը, մայրը, եղբայրն ու փոքրիկ քույրիկն են։ Նկարել է արդեն  այն ժամանակ, երբ  հայրը զոհվել էր:

IMG_2004

Նա  չնայած գիտի, որ հայրը զոհվել է, բայց մինչ օրս սպասումէ հայրիկին, իսկ նրա  փոքրիկ քույրը՝  երեք տարեկան Մարիանան, ամեն օր հարցնում է, թե հայրիկը երբ է վերադառնալու տուն: Մայրը՝ տիկին Արշալույսը, ամեն անգամ պատասխանում է, որ հայրը երկնքում հետևում է նրանց։ Յուլիանան դեռ 10 տարեկան է, բայց արդեն  հստակ որոշել  է՝  դերասանուհի է դառնալու:  Հայրը նրա որոշման մասին տեղյակ էր:

IMG_1983

Տիկին Արշալույսը պատմում է՝ դեպքը տեղի ունեցել ապրիլի 4 ին: Մինչ այդ անընդհատ կապի մեջ  է եղել ամուսնու հետ, բայց հետո ինչ- որ պահից կապը ընդհատվել է, իսկ արդեն լուսադեմին պարզ է դարձել ամեն ինչ: Դավիթը զոհվել է Մատաղիսում:

IMG_1982

Արշալույսը  մինչ  օրս մանրամասն հիշում է իրենց  առաջին հանդիպման մասին՝ ինչպես ծանոթացան, ինչպես ամուսնացան, միասին ինչ նպատակներ ունեին իրականացնելու։ Մի քանի տարի երեխա չեն ունեցել, հետո ծնվել  է առաջնեկը՝ որդին՝ Յուրին:

IMG_2058

 

Նպատակներ շատ ունեին: Մեծ ընտանիքում էին ապրում: Երազում էին ունենալ իրենց սեփական բնակարանը:  Հիմա Դավիթի ընտանիքն ապրում է  վարձով, բայց խոստացել են, որ բնակարան հատկացնեն։ Դավիթի մահից հետո Արշալույսին հրավիրում են աշխատանքի զինված ուժերում: Ասում է, որ մինչ այդ դեպքերն էին որոշել միասին աշխատել՝ նույն համակարգում։ Անհամբերությամբ էր սպասում այն օրվան, երբ ամուսնու հետ միասին առավոտյան գնային աշխատանքի։ Արշալույսը այժմ գնում է  աշխատանքի, բայց միայնակ… ու մեծացնում երեք երեխաներին:

IMG_2042

Ասում են վիշտը միավորում է  բոլորին ու  նույն քաղաքում ապրող անծանոթները մեկ օրում դառնում են հարազատներ ու մտերիմներ: Ստեփանակերտում  ապրող  զոհված զինծառայողների ընտանիքներն այսօր  մեկը մյուսին ճանաչում են, ընկերություն են անում,  գիտեն միմյանց խնդիրների մասին: Տիկին Արշալույսն է բացատրում մեզ հաջորդ զոհված զինծառայողի տան վայրը: Այցելում  եմ Մասիս  Թովմասյանի բնակարան: Մասիսն ունի  երկու երեխա:

IMG_2056

Կինը՝ Էլմիարան, աշխատում է Ստեփանակերտի ինֆեկցիոն հիվանդանոցում որպես բուժքույր, ասում է, որ իր օրը  նախկինում բացվում էր  ապագայի ծրագրերով, իսկ  Մասիսից հետո  անիվը  բոլորովին այլ ուղղությամբ է պտտվում։ Եթե զինվորականի կինը ինչ- որ տեղ պատրաստ  է  դաժան լուրեր լսելու, ապա իր պարագայում այդպես չէ  .. Մասիսը մեկնել էր կամավոր, Մասիսը  իրավաբան էր, սակայն մասնագիտությամբ չէր աշխատում:

IMG_2027
Մասիսը ապրիլի 2- ին մեկնում է ճակատ և զոհվում լույս երեքի գիշերը:

IMG_2029

Back to top button