Հասարակություն

Հանրակրթության ոլորտում լուրջ փոփոխություններ են ակնկալվում

hasmikdilanyan
Ավանդական օգոստոսյան խորհրդակցությունների շարքն ավարտված է:  Այն ամփոփվել է այսօր՝ Երևանում՝ նախ հիմնական դպրոցների տնօրենների, հետո նաև ավագ դպրոցների տնօրենների հետ հանդիպումներով:  Ի դեպ, մարզերի ու մայրաքաղաքի դպրոցների հիմնախնդիրները բոլորովին տարբեր են: ԿԳ նախարար Լևոն Մկրտչյանն էլ է փաստում՝  արդեն մի քանի տարի է, որ Սյունիքի մարզի ու ընդհանրապես լեռնային շրջաններում  առաջին   դասարաններ չեն  կազմավորվում: Թե ինչպես է լուծվելու այս ու ընդհանրապես 300-ից պակաս  աշակերտ  ունեցող դպրոցների խնդիրը, դեռ պարզ չէ։ Միջազգային փորձն է ուսումնասիրվում: Կրթության ոլորտում սակայն մի շարք հստակեցումներ այդուհանդերձ կան։ Օրինակ՝ երկարամյա տնօրեններին նրանց զավակները նույն դպրոցում չեն կարող փոխարինել,  զավակները կարող են տնօրենի մրցույթին մասնակցել, սակայն, այլ դպրոցի համար: Սա միակ փոփոխությունը չէ:

 

Լևոն Մկրտչյանը կրթության ու գիտության նախարարի պաշտոնին չորրորդ անգամ է վերադառնում: Այս անգամ էլ նա փոփոխությունների  փաթեթով ներկայացավ: Վստահեցնում է՝ օգոստոսյան  խորհրդակցությունների ընթացքում առաջարկները տնօրենների ու մանկավարժների հետ քննարկել է: Նախ,  հիմնական դպրոցների մասին. 4-րդ և 9- րդ դասարանների քննությունների ձևաչափը վերադարձվում է նախկինին՝ թեստերին փոխարինելու են գալիս փոխադրությունն ու շարադրությունը

«Որպեսզի երեխաները ունենան իրենց եսը։ Թեստային համակարգը կլինի ավելի շատ ավագ դպրոցում, իսկ հիմնական դպրոցի խնդիրներից  կարևորագույնը քաղաքացու և անձնավորության դաստիարակումն է։ Ճիշտ կլինի, որ երեխաներն այդ ձևաչափով աշխատեն»:

Երևանի թիվ 45  հիմնական  դպրոցի տնօրեն  Միհրան Փաշայանը կիսում է նախարարի կարծիքը   Դպրոցը  պետք է ոչ թե թեստային ու կաղապարված  լինի, այլ՝ ազատ: Ներքին ազատություն է պետք երեխային՝ ասում է:

Երկարամյա տնօրեն  Միհրան Փաշայանը խոստովանում է՝ պարբերաբար նախապատրաստվելով քննություններին՝ սթրեսի է ենթարկվում, այն իմաստազուրկ է համարում: Ի վերջո, տնօրենի  աշխատանքի վերջնական գնահատականը ոչ թե օրենսդրական դաշտը, այլ երեխաների հետ շփվելու ունակությունը, մանկավարժական կոլեկտիվը ղեկավարելու ունակություն պետք է լինի՝ ասում է:

Երկար ժամանակ մամուլում քննադատությունների արժանացած դպրոցի տնօրենի պաշտոնը ժառանգաբար փոխանցելու հարցը Երևանի քաղաքապետի համար էլ ընդունելի չի:

Դպրոցների երկարամյա,  65 տարին լրացած տնօրենների աշխատանքային պայմանագրերը չեն թարմացվում: Երևանի քաղաքապետն ասում է, որ նրանց  այլ դպրոցներում մանկավարժ աշխատելու հնարավորություն է տրվում:

Մարզերի դպրոցներում խնդիրները բոլորովին այլ են՝  ֆինանսավորումից մինչև քիչ թվով աշակերտներ:  1430 դպրոցից  շուրջ 800- ում 300- ից քիչ աշակերտ է  սովորում։ Մեխանիկական լուծումների չենք  գնա՝ վստահեցնում է ԿԳ նախարար Լևոն Մկրտչյանն ու տեղեկացնում՝  խնդիրների լուծման համար այժմ միջազգային փորձն են ուսումնասիրում:

Ավագ դպրոցներում նույնպես փոփոխություններ են սպասվում: 12-րդ դասարանի երկրորդ կիսամյակում երեխան հնարավորություն կունենա այսուհետ ուսումնասիրել իր կողմից ընտրած երեք հիմնական առարկա, որոնցով էլ կշարունակի հետագա ուսումնառությունը՝ մասնակցելով միասնական քննություններին: Հնարավորություն կտրվի նաեւ, որ 12-րդ դասարանի աշակերտները դեկտեմբեր ամսին հանձնեն այն քննությունները, որոնք միասնական կարգով չեն հանձնելու: Փոփոխություններ կլինեն նաեւ ավարտական քննությունների մասով՝ կլինեն կրճատումներ: Նախկին 6-ի փոխարեն ավարտողները կհանձնեն 3 ավարտական քննություն: Հնարավոր է, որ կմնան միայն «Մաթեմատիկա», «Հայոց լեզու» եւ «Հայ ժողովրդի պատմություն» առարկաները:

Back to top button