Ա. Ադիբեկյան.«Ֆրիդըմ հաուզը» հաշվի չի առնում մեր սոցիոմշակութային առանձնահատկությունները

Մտքի ճկունություն, արագ կողմնորոշվելու ունակություն եւ գլոբալ ընկալունակություն. սրանք, ըստ հոգեբան Աննա Բադալյանի, հայի ազգային բնավորության հետաքրքիր առանձնահատկություններն են, որոնք հնարավորություն են տալիս հայերին ե՛ւ դրականը դրսեւորել, ե՛ւ բացասականը: Աննա Բադալյանը նշում է՝ բացառվում է, որ որեւէ ազգի տեսակ միանշանակ դրական ընկալվի աշխարհում: Ըստ հոգեբանի՝ հայությունն ունի ամբողջական բազա աշխարհին ըստ արժանվույնը ներկայանալու համար, սակայն, այլ հարց է՝ այն համարժեքորեն օգտագործվո՞ւմ է, թե՞ ոչ:

Հոգեբանը կարծում է, որ «Ֆրիդոմ հաուզ» միջազգային իրավապաշտպան կազմակերպության՝ օրեր առաջ ներկայացրած  զեկույցը, որտեղ հայերը ներկայացվել են առավելաբար բացասական ենթատեքստով, որոշակիորեն իր ազդեցությունը կունենա զբոսաշրջության վրա:

Սոցիոլոգ Ահարոն Ադիբեկյանի խոսքով, սակայն, պետք է նախ տեսնել, թե «Ֆրիդոմ հաուզ» միջազգային կազմակերպության տված վարկանիշներն ի՞նչ չափորոշիչների հիման վրա եւ ի՞նչ մեթոդաբանությամբ է ստացված: «Իրենց իրենց ստանդարտներով են մոտենում եւ հաշվի չեն առնում մեր սոցիոմշակութային առանձնահատկությունները»,- ասում է։

Ամեն դեպքում, սոցիոլոգը նույնպես կարծում է, որ նման զեկույցները որոշակի ազդեցություն են ունենում ոչ միայն զբոսաշրջության, այլեւ՝ ներդրումային մթնոլորտի վրա: Նա հիշեցրեց, օրինակ, որ ապրիլյան պատերազմի պատճառով դեպի Հայաստան ավիատոմսերի վաճառքը կրճատվեց 25 տոկոսով: