ՀՀ կառավարությունն «Ունիկում Ինժիներինգ» ընկերությանն տրամադրել է «Ալյանս» ազատ տնտեսական գոտու «ՌԱՕ Մարս» ՓԲԸ տարածքում շահագործողի թույլտվություն՝ էլեկտրոնիկայի և ճշգրիտ ճարտարագիտության ոլորտում գործունեություն ծավալելու համար: ՀՀ էկոնոմիկայի նախարար Արծվիկ Մինասյանը նշել է, որ ընկերությունը ռազմական նշանակության գիշերային տեսանելիության և ջերմատեսիլ սարքերի արտադրություն է նախատեսում:
«Նախատեսվում է, որ ծրագրի երկրորդ տարում` 2017թ., արտահանման ծավալները կկազմեն մոտ 5 մլն. դոլար, իսկ 5-րդ տարում` շուրջ 12 մլն. դոլար: Ծրագրի առաջին տարվա ընթացքում նախատեսվում է արտադրել և արտահանել մինչև 1000 սարքեր, հետագայում ավելացնելով քանակը մինչև 5500-ի: Արտահանման հիմնական ուղղությունը հանդիսանում է ՌԴ-ն»,- ասել է էկոնոմիկայի նախարարը:
Նշենք, որ ծրագրի շրջանակներում (5 տարի) իրականացվելիք ներդրումները կկազմեն շուրջ 31 մլն. դոլար, առաջին տարում կստեղծվի 10 նոր աշխատատեղ` 150 հազար դրամ միջին աշխատավարձով, իսկ հինգերորդ տարում` ավելի քան 35` 350 հազար դրամ միջին աշխատավարձով:
Ընկերությունն ունենալու է մոտ 60 քմ գրասենյակային և մոտ 400քմ. արտադրական տարածք: «Սիտրոնիկս Արմենիա» ՓԲԸ համաձայն է տրամադրել վերոնշյալ տարածքն ընկերությանը 5 տարի ժամկետով և ապահովել համապատասխան ենթակառուցվածքով:
