Հասարակություն

Արթիկը հեղեղից հետո. քաղաքապետարանը օգնության կոչ է անում

aidaavetisyan

Հեղեղը օրերս մեծ վնասներ հասցրեց Արթիկին։ Ավերվել են  անասնագոմեր, սատկել են անասուններ,  ջրի տակ են  անցել բնակարաններ, տուժել են ենթակառուցվածքներ: Հեղեղից մեկ օր անց  Արթիկում եղավ նաև վարչապետ Հովիկ Աբրահամյանը՝ իրավիճակին տեղում ծանոթանալու համար: Գործադրի ղեկավարը հանդիպեց նաև  տուժած բնակիչների հետ, խոստացավ վնասի չափերը հաշվարկելուց աջակցություն ցուցաբերել։

Հունիսի 24-ին տեղեկություն ստացվեց, որ Շիրակի մարզի Արթիկ քաղաքում սելավատարների խցանման հետևանքով ջուրը լցում է  կենտրոնական փողոցները. անհրաժեշտ է փրկարարների օգնությունը: Դեպքի վայր են մեկնել մարզային փրկարարական վարչության օպերատիվ խումբը և չորս մարտական հաշվարկ: Պարզվել է, որ վարարել էր Ղարանղու գետը, խոշոր գլաքարերի կուտակումներ էին առաջացել Մովրովի և Բմբուլենց սելավատարերում, ինչի հետևանքով ջրալցվել էին մի շարք փողոցներ, Արթիկ-Գյումրի ավտոճանապարհի 1-ին կմ-ը, երկրորդական մի շարք փողոցներ, որտեղ ջրի մակարդակը հասնում էր մոտ 40 սմ-ի:

Ջրալցվել է նաև Արթիկի թիվ 2 մանկապարտեզը, որտեղից փրկարարները դուրս են բերել 70 երեխա և 27 աշխատակից։ Նրանք տեղափոխվել են անվտանգ տարածք: Տարհանվել են բնակիչներ, ջրալցված անասնագոմերի անվտանգ տարածք են տեղափոխվել կենդանիներ, սակայն որոշ անասնագոմերում անասունները սատկել են: Ղարիբջանյան փողոցում վնասվել է կամուրջի հիմքը, Ազատության փողոցի տներից մեկի արտաքին պատը մասնակի փլուզվել է:  Արթիկի բնակիչ  Մանվել Նողրովյանը  բնակվում է  Անկախության փողոցի շենքերից մեկում: « Ռադիոլուրի»  հետ զրույցում արթիկցին պատմում է հունիսի 24-ին տեղի ունեցած  աղետի մասին: Ջուրը լցվել է իր, ավագ եղբոր բնակարաններ՝ վնասելով ողջ գույքը:

Վնասվել է նաև  կարտոֆիլի ցանքատարածությունը՝ ասում է: Ավագ եղբոր և իր ընտանիքները այժմ ժամանակավորապես  բնակվում են հարազատների տանը, մինչև որ  կվերականգնեն բնակարանները: Հունիսի 25-ին  վարչապետ Հովիկ Աբրահամյանը աշխատանքային այցով  եղել է  Արթիկ քաղաքում՝ տեղի ունեցած հեղեղի հետևանքներին և պատճառած վնասներին տեղում ծանոթանալու նպատակով: Վարչապետն այցելել է  տուժած թաղամասեր, եղել է նաև մանկապարտեզում և դպրոցում: Հանդիպել է բնակիչների հետ: Գործադրի ղեկավարը հավաստիացրել է, որ կառավարությունը  բնակիչների կողքին է և կհատկացնի անհրաժեշտ օժանդակություն:

Արթիկի քաղաքապետ Արսեն Աբրահամյանի գլխավորությամբ   ստեղծվել է մարզային հանձնաժողով՝ կրած վնասի չափերը հաշվարկելու համար: Սակայն մինչ վերջնական արդյունքները,  քաղաքապետը «Ռադիոլուրին» ներկայացրեց  նախնական պատկերը: «Այս պահի դրությամբ վնասված բնակարանների թիվը  31-ն է:  Մեկ մանկապարտեզ, մեկ դպրոց, դատարանի շենքի նկուղն է հեղեղվել: Մոտ 20, հազ. քմ ցանքատարածություն է վնասվել՝ սիզամարգեր, մարգեր և այլն»։

Արթիկի քաղաքապետ Արսեն Աբրահամյանի խոսքով՝ այս պահի դրությամբ հեղեղման  վտանգ չկա: Հեղեղատարը վերադարձված է հիմնական ջրատար:  Իսկ այժմ քաղաքում իրականացվում են քաղաքային ենթակառուցվածքների  վերականգնման աշխատանքներ: Քաղաքային իշխանությունների ջանքերով և կամավորների օգնությամբ մաքրվում են  տներն ու նկուղային հատվածները:

Տեղեկացնենք նաև, որ քաղաքապետարանը կոչ է արել օգնել Արթիկին՝ աղետի հետևանքները վերացնելու համար։ Օգնության համար բացվել է բանկային հաշիվ, որը տեղադրված է քաղաքապետարանի ֆեյսբուքյան էջում։

Back to top button